स्रोत नखुलेको रकम सहित पक्राउ परेकालाई राजश्व अनुसन्धान विभाग बुझाइयो
दमौली । तनहुँको दमौली बजारमा स्रोत नखुलेको करिब १२ लाख रुपैयाँ नगद सहित पक्राउ परेका दुई जनालाई अनुसन्धानका लागि राजश्व अनुसन्धान विभाग काठमाडौ बुझाइएको छ ।
व्यास नगरपालिका–३ दुर्गामन्दिरस्थित सडकबाट पक्राउ परेका रोल्पाको माडी गाउँपालिका–५ पासाबाङ स्थायी घर भई हाल काठमाडौ चन्द्रागिरी नगरपालिका–१० बस्ने २५ वर्षीय सुसान केसी र सोही ठाउँका २० वर्षीय लक्ष्मण केसीलाई बिहीबार राजश्व अनुसन्धान विभाग बुझाइएको तनहुँ प्रहरीले बताएको छ ।
उनीहरुलाई थप अनुसन्धानका लागि राजश्व अनुसन्धान विभाग पठाइएको जिल्ला प्रहरी कार्यालय तनहुँका प्रहरी नायब उपरिक्षक दीपक रायले जानकारी दिए ।
लक्ष्मण केसीले चलाएको बा ५७ प ७५०६ नं. को बुलेट मोटरसाइकल रोकी जाँच गर्ने क्रममा प्रहरीले बुधबार साँझ उनीहरुलाई पक्राउ गरेको थियो । प्रहरीले एक हजार रुपैयाँका ३६५ थान र पाँच सय रुपैयाँका एक हजार छ सय नोट बरामद गरेको थियो ।
