दमौली वृहत योग विज्ञान शिविर सुरु

पतञ्जली योग जिल्ला समिति तनहुँको आयोजना तथा व्यास नगरपालिकाको सहयोगमा दमौलीमा आजदेखि वृहत योग विज्ञान शिविर सुरु भएको छ । योगप्रति सर्वसाधारणलाई आकर्षित गर्ने उद्देश्यसहित व्यास नगरपालिका-३ खुला मैदानमा बृहत् योग विज्ञान शिविर सुरु भएको छ । शिविर वैशाख ७ गतेसम्म सञ्चालन हुनेछ ।

‘योग गरौँ : निरोगी रहौँ’ भन्ने नारासहित योगको बारेमा प्रचारप्रसार गर्दै स्वस्थ रहन उत्प्रेरित गर्ने उद्देश्यले शिविर आयोजना गरिएको बृहत् योग विज्ञान शिविर व्यवस्थापन समितिका संयोजक राजकुमार श्रेष्ठले जानकारी दिनुभयो ।

जुनसुकै उमेर र क्षमताका महिला तथा पुरुष निरोगी भएमा सधैँ स्वस्थ रहन, रोगी भएमा रोगबाट छुटकारा पाउन योगको आवश्यकता रहेको श्रेष्ठले बताउनुभयो ।

शरीरमा रक्तसञ्चार बढाउन, शरीरका सबै अङ्गमा अक्सिजनको मात्रा पुर्‍याउन र रोग प्रतिरोधात्मक क्षमता बढाउन, विभिन्न प्रकारका रोग जस्तै टाउको दुखाइ, कब्जियत हुने, घुँडा दुखाइ, मधुमेहसम्बन्धी समस्या निराकरणका लागि नियमित योगको आवश्यकता रहेको श्रेष्ठ बताउनुहुन्छ ।

पतञ्जली योग समिति शुक्लागण्डकी, शुक्लागण्डकी नगर उद्योग वाणिज्य संघ र शुक्लागण्डकी नगरपालिकाको संयुक्त आयोजनामा खैरेनीटारमा पनि शुक्रबारदेखि निःशुल्क योग विज्ञान शिविर सुरु भएको छ ।

शुक्लागण्डकी नगरपालिका-७ स्थित सरस्वती नमूना माध्यमिक विद्यालयमा सुरु शिविर वैशाख ५ गतेसम्म सञ्चालन हुनेछ। शिविर प्रत्येक दिन बिहान ५ बजेदेखि ७ बजेसम्म सञ्चालन हुने शुक्लागण्डकी नगर उद्योग वाणिज्य संघका उपाध्यक्ष सुजित हिराचनले जानकारी दिनुभयो ।

पछिल्लो समय जिल्लामा योगको आकर्षण बढिरहेको छ । पतञ्जली विभिन्न स्थानीय तह र संघसंस्थासँग समन्वय गरी योग शिविर सञ्चालन गर्दै आएको छ । यस अगाडि व्यास नगरपालिकाको सहयोगमा व्यास नगरपालिका-५ चापाघाटमा र आँबुखैरेनी गाउँपालिकाको सहयोगमा आँबुखैरेनी गाउँपालिका-३ रामशाह प्राविमा शिविर सञ्चालन गरिसकेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर