नगरबासिसंग व्यासको आग्रह : “वातावरणमैत्री नगर बनाउने अभियानमा सघाउनुस”
दमौली । तनहुँको व्यास नगरपालिकाले वातावरणमैत्री नगरपालिका बनाउने अभियानमा सघाउन नगरबासीलाई आग्रह गरेको छ । बुधबार विज्ञप्ती जारी गर्दै नगरपालिकाले वातावरणमैत्री नगरपालिका निर्माणमा दीर्घकालीन सोचका साथ अघि बढेको सन्दर्भमा यो अभियानमा नगरवासीको सहयोगको अपेक्षा गरेको छ ।
नगरपालिकाका वन तथा वातावरण समिति संयोजक रनसिं नेपालीद्वारा जारी विज्ञप्तिमा विगत लामो समयदेखि समाधान हुन नसकेको फोहोर व्यवस्थापनमा स्थायी समाधानका लागि विज्ञद्वारा वर्गीकरणको काम भइरहेको र यसलाई पूर्णता दिन नगरबासिको साथ र सहकार्यको आग्रह गरिएको छ ।
विज्ञप्तिमा कुहिने फोहोर व्यास–१०, गौ संरक्षण केन्द्रमा विसर्जन गरिएको छ भने नकुहिने फोहोरलाई पुनःप्रयोगमा आउने सामग्री छुट्याई बिक्रीमा पठाइनेछ। त्यस्तै शिशाजन्य सामग्री अलग्गै संकलन गरी बिक्रीमा गइसकेको र स्थायी समाधानका लागि जग्गा खरिद प्रक्रिया अघि बढिसकेको उनले उल्लेख गरिएको छ ।
व्यास नगरपालिका क्षेत्रभित्र गत जेठ १ गतेदेखि प्लाष्टिकका झोला, प्लेट, कप लगायतका हानिकारक प्लाष्टिक जन्य वस्तुको प्रयोगलाई निषेधित गरिएको छ । विज्ञप्तिमा भनिएको छ, ‘वातावरण प्रदूषण न्यूनीकरण गर्दै वातावरणलाई स्वच्छ र सफा राख्न व्यास नगरपालिकाद्वारा बनेको व्यासनगर प्लाष्टिक जन्य वस्तुको प्रतिबन्ध गर्ने सम्बन्धी ऐन २०८१ र सोको कार्यविधि अनुसार प्लाष्टिकका झोला, ग्लास र प्लेटको प्रयोगलाई निषेध गर्ने र सोको सट्टामा वातावरण मैत्री कपडा, जुट वा कागजका झोलाहरू र कागजका कप प्लेट वा दुना टपरी वा जैविक पदार्थबाट बनेका वस्तुहरू मात्र प्रयोग गर्न आग्रह गरेका छौ ।’
निषेधित वस्तुहरू व्यासनगर क्षेत्रभित्र उत्पादन, बिक्री वितरण वा प्रयोग गर्न प्रतिबन्ध गरिएको र नगरको ऐन नियम विपरित गरेको पाइएमा नगरपालिकाले नगरसभाबाट पारित ऐन अनुसार जरिवाना गरिने जनाइएको छ ।
