दुलेगौँडाको तीज गीत प्रतियोगितामा पोखराको राधा कृष्ण दिदीबहिनी समुह प्रथम
दुलेगौंडा : तनहुँको शुक्लागण्डकी नगर उद्योग वाणिज्य संघ, वडा व्यवस्थापन समिति वडा नं. ४ ले आयोजना गरेको खुल्ला तीज गीत प्रतियोगितामा पोखरा–३२ लामेआहाल स्थित राधाकृष्ण दिदी बहिनीको समुह प्रथम भएको छ ।
तीजको अवसरमा दुलेगौंडामा शुक्रवार आयोजना गरिएको प्रतियोगितामा दुलेगौंडा आमा समुह द्धितीय भएको छ भने उन्नतीशिल आमा समुह दुलेगौंडा तृतीय र दिदी बहिनी आमा समुह साँखेले सान्त्वना स्थान हाँसिल गरेको छ । नृत्यतर्फ हरियाली आमा समुह ढोरफिर्दी र उत्कृष्ट भेषभुषातर्फ अरनिको बोर्डिङ स्कुल हुन सफल भएको छ ।
प्रतियोगितामा प्रथम भएसँगै राधाकृष्ण दिदी बहिनीको समुहले नगद २५ हजार, द्धितीय स्थान प्राप्त दुलेगौंडा आमा समुहले १५ हजार, उन्नतीशिल आमा समुहले १० हजार र सान्त्वना भएको दिदीबहिनी समुहले ३ हजार रुपैया साथमा प्रमाणपत्र पाएका छन् । प्रतियोगतामा सहभागी उत्कृष्ट नाँच र पोशाकलाई नगद २ हजार समेत प्रदान गरिएको थियो ।
हरितालिका तीज पर्वका अवसरमा हरेक बर्ष दुलेगौंडामा आयोजना गरिने तीज गीत प्रतियोगिताको निरन्तरताका रुपमा आयोजना गरिएको प्रतियोगितामा १२ समुहले सहभागीता जनाएका थिए ।
यसअघि शुक्लागण्डकी नगरपालिकाका नगर प्रमुख कृष्णराज पण्डितले प्रतियोगीताको उद्घाटन गर्दै यस प्रकारका कार्यक्रमले परमपरागत संस्कृतिको संरक्षणमा टेवा पुग्ने विश्वास व्यक्त गरेका थिए ।
शुक्लागण्डकी नगर उद्योग वाणिज्य संघ, वडा व्यवस्थापन समिति वडा नं. ४ का सभापति प्रकाश थापाको अध्यक्षतामा भएको कार्यक्रममा शुक्लागण्डकी नगर उद्योग वाणिज्य संघका अध्यक्ष बिमल प्रसाद रिमाल लगायतले राष्ट्रिय भलिबल खेलाडी उषा भण्डारीलाई नगद पुरस्कार सहित सम्मानपत्रले सम्मान गरेका थिए ।
उक्त प्रतियोगीतामा लोक दाहेरी गायीका पुजा पुरी, गायीका उर्मिला थापा मगरले सांगितिक प्रस्तुति दिएका थिए । स्थानीय प्रतिभा सृजना रानाले नृत्य र हरी खरेलले हाँस्यव्यङ्गय प्रस्तुति दिएका थिए ।
