जो जहाँ छ त्यही चाडपर्व मनाउनुस्, सावधानी र सचेत रहन जिल्ला संकट व्यवस्थापन केन्द्र तनहुँको आग्रह
- भञ्ज्याङ समाचारदाता (दमौली)
जिल्ला संकट व्यवस्थापन केन्द्र तनहुँले चाडपर्व मनाउँदा सावधानी अपनाउन र सचते रहनका लागि आग्रह गरेको छ । समुदायमा कोरोना भाइरस -कोभिड-१९) फैलदो क्रममा रहेको र नेपालीका ठूला चाडपर्वहरु पनि नजिकिएको हुँदा सावधानी र सचेत रहन आग्रह गरेको हो ।
नजिकिदै गरेको नेपालीहरुको महान चाड बडा दशै, तिहार, छठ लगायतका चाडपर्वहरु मनाउने सर्न्दर्भमा विश्वव्यापी फैलिएको कोभिड-१९ संक्रमणको जोखिम तनहुँ जिल्लामा पनि बढिरहेको अवस्था भएकाले जोखिम कम गर्दै र जोखिमबाट बच्दै चाडपर्व मनाउनुका साथै दैनिक आर्थिक क्रियाकलाप पनि सुचारु रुपमा सञ्चालन भइरहेकोले सबैले आ-आफ्नो क्षेत्रबाट सचेत र सावधानी अपनाउन भनिएको छ ।
सहायक प्रमुख जिल्ला अधिकारी चित्राङ्गत बरालले विहीबार चाडपर्वमा सावधानी अपनाउने सम्बन्धी सूचना जारी गर्दै चाडपर्व मनाउँदा सकभर जो जहाँ रहेका छौ, सोही ठाउँमा रहि अनावश्यक जमघट र यात्रा नगरी आफ्नै परिवारका सदस्यहरुबीच घरमै मात्र मनाउन भनिएको छ ।
जिल्ला भित्र कुनै प्रकारका मेला, जात्रा, महोत्सव तथा अनावश्यक भीडभाड हुने जमघट, चियापान र शुभकामना आदान प्रदान कार्यक्रम नगर्न संकट व्यवस्थापन केन्द्रले आग्रह गरेको छ ।
जारी सूचनामा जुवातास खेल्ने लगायतका कानूनले निषेधित गरेका कार्यहरु नगर्ने नगराउने, सवारी साधानहरुमा नेपाल सरकारले तोकेको मापदण्ड भन्दा बढी यात्रु नराख्न र सबै किसिमका स्वास्थ्य सुरक्षा मापदण्डा अनिवार्य रुपमा पालना गर्ने गराउने भनिएको छ ।
बजारमा भिडभाड नगर्ने, सामाजिक भौतिक दुरी कायम गर्ने, अनिवार्य रुपमा मास्क लगाउने, नियमित रुपमा साबुन पानीले पटक पटक हात धुने वा स्यानिटाइजरको प्रयोग गर्ने जस्ता न्यूनतम स्वास्थ्य र सुरक्षाका मापदण्ड अनिवार्य रुपमा पालना गर्ने गराउने भनिएको छ ।
उद्योग, व्यापार, लगायतका व्यवसाय गर्दा नेपाल सरकारले तोकेका न्यूनतम स्वास्थ्य र सुरक्षाको मापदण्डको अनिवार्य पालना गर्ने गराउने, पूजापाठलाई घरघरमै सिमित गर्ने राउने, मन्दिर र तीर्थस्थलहरुमा पुजारीबाट मात्र नित्य पूजापाठ गाराउने बाहेक मठ मन्दिरहरु खुला नगर्ने नगराउने भनिएको छ ।
यस्तै, सूचनामा विदाका समय भनि समूहमा घुमफिर नगर्ने, नगराउने, खेलकुद र साँस्कृतिक कार्यक्रम, देउसी भैलो नखेल्ने, नखेलाउन भनिएका छ ।
