आदिकवि भानुभक्त आचार्यको १५६औं स्मृति दिवस मनाइयो
भानु : राष्ट्रिय विभूति आदिकवि भानुभक्त आचार्यको १५६औं स्मृति दिवस चुँदीरम्घामा मनाइएको छ। स्मृति दिवसका अवसरमा आइतबार आचार्यको समाधिस्थल सतिघाट धाममा रुद्राक्षको १५६ वटा विरुवा रोपिएको छ ।
कार्यक्रममा भानु नगरपालिकाका प्रमुख आनन्दराज त्रिपाठीले भानुभक्त आचार्यको योगदानको चर्चा गर्दै नेपाल एकीकरणमा पृथ्वीनारायण शाहको योगदान जत्तिकै, नेपाली भाषामा भानुभक्त आचार्यको योगदान अतुलनीय रहेकाले राज्यको तर्फबाट उच्च सम्मान मिल्नुपर्ने बताए ।
उपप्रमुख उमा गोतामेले नगरपालिकाको नामाकरण भानुभक्त आचार्यको नाममा भएकोमा खुशी व्यक्त गर्दै भानु जन्मस्थललाई साहित्यिक र धार्मिक पर्यटकीय स्थलको रूपमा विकास गर्न पहल भइरहेको बताइन् ।
त्यस्तै, नगरपालिकाका प्रमुख प्रशासकीय अधिकृत दिवाकर पौडेलले भानु जन्मस्थल क्षेत्रको विकासका लागि राष्ट्रपति रामचन्द्र पौडेलको विशेष चासो रहेको र गत आर्थिक वर्षमा ५ करोडको बजेट विनियोजन भएको जानकारी गराए ।
कार्यक्रममा स्थानीय जनप्रतिनिधि, नेपाली सेनाको रुरु भैरव दल गण, शसस्त्र प्रहरी बल मनकामना गण, नेपाल प्रहरीका पदाधिकारी र जवानहरूको सहभागिता रहेको थियो भने सहभागिहरुले भानुभक्त आचार्यको योगदानको चर्चा गरेका थिए । आदिकवि भानुभक्त आचार्यको जन्म १८७१ असार २९ र मृत्यु १९२५ असोज ६ मा भएको थियो ।
