दमौलीस्थित व्यासगुफामा सप्ताह ज्ञान महायज्ञ शुरु
दमौली : तनहुँको व्यास नगरपालिका–३ दमौलीस्थित प्रसिद्ध धार्मिकस्थल व्यासगुफामा बुधबारदेखि सप्ताह ज्ञान महायज्ञ आजबाट सञ्चालन गरिएको छ ।
आयोजक समितिले मंगलबार पत्रकार सम्मेलन गरी यहि कातिक २१ देखि २८ गतेसम्म सप्ताह ज्ञान महायज्ञ गर्न लागिएको जानकारी गराएको छ । वेदानुयायी प्रतिष्ठान नेपाल केन्द्रीय समिति र विश्व हिन्दु महासंघ नेपालले संयुक्त रुपमा विश्व ऊँकार हिन्दु महामिलन पर्वको अवसरमा महायज्ञको आयोजना गरेको हो ।
श्रीमद् भागवात महायज्ञको उद्घाटन समारोहमा आयोजकले बुधवार बिहान ११ बजे दमौली बजार क्षेत्रमा कलशसहितको शोभायात्रा गरिने वेदानुयायी प्रतिष्ठान नेपाल केन्द्रीय समितिका अध्यक्ष एवं प्रमुख वाचक कृष्णकान्त काफ्लेले जानकारी दिए ।
उनका अनुसार व्यास क्षेत्रमा निर्माणधीन योग भवन सम्पन्न गर्न, अन्नक्षेत्रमा आश्रित अशक्त, बाहिरबाट आउने पाहुनको सहयोगार्थ अक्षयकोष स्थापना र व्यासभूमिको गरिमा अभिबृद्वि गर्ने उद्देश्य रहेको छ ।
‘आध्यत्मिक सोचले व्यासक्षेत्रको विकास गर्न गतबर्ष देखि महायज्ञको आयोजना गर्दै आएको समितिले जनाएको छ । बालबालिका, बृद्वबृद्वा, असक्त, तीर्थयात्रीलाई निःशुल्क भोजन र बासको व्यवस्था गर्दै आएको छौ’ उनले भने, ‘बाहिर जिल्लाबाट आउने पाहुनालाई तीन दिनसम्म खाने र बस्ने सुविधा प्रदान गर्ने गरिएको छ ।’
बौद्धिक सनातन धर्मको जर्गेना गर्दै व्यासऋषिको तपोभूमिलाई विश्वमाझ पु¥याउन प्रचारप्रसारमा थप टेवा पुग्ने विश्वास लिइएको वेदानुयायी प्रतिष्ठान नेपाल केन्द्रीय समितिका संरक्षक दामोदर बाबाले बताए ।
बिहान ६ः३० देखि दिउँसो १२ बजेसम्म भगवत्वपूजा, अर्चना रुद्राभिषेक, जप, हवन श्रीमदभागवत पाठपारायण गरिने भएको छ । दिउँसो १२ बजेदेखि ४ बजेसम्म भागवत रसमर्मज्ञ, विशिष्ट विद्धान तथा सन्तहरुको आध्यात्मिक प्रवचन हुने छ ।
यस्तै, साँझ ५ः३० बजेदेखि हरिनाम संकीर्तन, विभिन्न जातिका मौलिक संस्कार र संस्कृति झल्किने झाँकी प्रदर्शन गरिने भएको छ । समितिले आयोजना गरेको महायज्ञबाट योग भवन, अन्नक्षेत्र संचालानार्थ अक्षयकोष पछि बचत हुने रकमले सामाजिक क्षेत्रमा खर्च गर्ने योजना रहेको आयोजकले जनाएको छ ।
