एमालेको जनजागरण सभा : राजतन्त्र फर्किने सम्भावना छैन, प्रतिगामीविरुद्ध सबै एकजुट हुनुपर्छ
दमौली : नेपाल कम्युनिष्ट पार्टी (एमाले) तनहुँले दमौलीमा संघीय लोकतान्त्रिक गणतन्त्रको पक्षमा जनजागरण सभा गरेको छ । उक्त जनजागरण सभालाई सम्बोधन गर्दै एमाले नेताहरुले राजतन्त्र फर्किने सम्भावना नरहेको र प्रतिगामीविरुद्ध सबै एकजुट हुनुपर्नेमा जोड दिएका छन् ।
जनजागरण सभामा सहभागि भएका नेता कार्यकर्ताहरुले जिल्ला पार्टी कार्यालयबाट निकालिएको ¥यालीले दमौली बजार परिक्रम गरी प्रशासनचोकस्थित अनशनचौतारीमा सभा गरिएको थियो ।
उक्त जनजागरण सभालाई सम्बोधन गर्दै नेकपा एमालेका स्थायी कमिटी सदस्य एवं गण्डकी प्रदेश इन्चार्ज एवं स्थायी कमिटी सदस्य किरण गुरुङले नेपालमा राजतन्त्र फर्किने सम्भावना नरहेको बताएका छन् । गुरुङले प्रतिगामी तत्वहरुले टाउको उठाउन खोजेको भन्दै त्यस्ता विरुद्ध सबै एकजुट हुनुपर्ने बताए ।
‘प्रतिगामीले टाउको उठाउने प्रयास गरेका छन् । त्यस्तालाई टाउको उठाउन दिनुहुँदैन । हामी सबै गणतन्त्रवादी एकजुट भएर प्रतिगामीको विरुद्ध लडौ’, नेता गुरुङले भने, ‘आफ्नो वंश बचाउन नसक्नेले देशको संरक्षण गर्न नसक्ने भन्दै लुटपाट र हिंसाका घटना घटाउँछु भन्ने सपना नदेखे हुन्छ ।’
बैंक ठगीमा लागेकाहरुको नेतृत्वमा राजतन्त्र फर्काउँछु भन्नु बालुवामा पानी हाले जस्तो भएको गुरुङको टिप्पणी थियो । राजाको शासन भएको बेला राजाले अवसर सदुपयोग गर्न नसकेको आरोप लगाउँदै गुरुङले वर्तमान व्यवस्था मानेर राजनीति गर्न आग्रह गरे ।
उनले भने, ‘राजालाई शासन गर्न मन लागेको भए राजनीतिक दल खोलेर चुनावमा आए हुन्छ । सभा सम्मेलन गर्न खुल्ला छ । लोकतान्त्रिक गणतन्त्र व्यवस्था मानेर आए राष्ट्रपति प्रधानमन्त्री बन्न पाइन्छ ।’
नेकपा (एमाले) का पोलिटव्युरो सदस्य टुकराज सिग्देलले ठूलो त्याग र समर्पणबाट गणतन्त्र आएकाले गणतन्त्र मास्छु भनेर सपना नदेख्न विरोधीलाई चेतावनी दिए । राजतन्त्रको समयमा भन्दा गणतन्त्र आएपछि नेपालमा धेरै विकास भएको उनको भनाइ थियो ।
एमाले केन्द्रीय सदस्य सविता रसाईलीले समावेशी लोकतान्त्रिक गणतन्त्रलाई अझ उन्नत बनाएर लैजानुपर्ने बताइन्। उनले राजतन्त्र कालमा दलित, महिला र जनजातीले उपभोग गर्न नपाएको बताइन् ।
एमाले जिल्ला कमिटी तनहुँका अध्यक्ष हरिराज कडेलको अध्यक्षतामा आयोजित उक्त कार्यक्रमको जिल्ला सचिव प्रदिपराज अधिकारीले र जिल्ला कमिटीका उपाध्यक्ष राजेश्वर ढकालले सहजिकरण गरेका थिए ।
