बन्दीपुर केबलकार उद्यमशील पत्रकारिता पुरस्कारबाट अधिकारी, भट्टराई र नेपाली पुरस्कृत
पर्यटकीय नगरी बन्दीपुरमा सञ्चालित बन्दीपुर केबलकार एण्ड टुरिजम लिमिटेडले स्थापना गरेको बन्दीपुर केबलकार उद्यमशील पत्रकारिता पुरस्कारबाट तीन जना पत्रकार पुरस्कृत भएका छन् । लिमिटेडको शनिबार आयोजित चौथौ साधारणसभाका अवसरमा डिपी अधिकारी, प्रकाशचन्द्र भट्टराई र सानेबहादुर नेपालीलाई पुरस्कृत गरिएको हो ।
उनीहरुलाई जनही रु ५१ हजार, दोसल्ला र सम्मानपत्रले पुरस्कृत गरिएको छ। कार्यक्रमका प्रमुख अतिथि तनहुँ-१ का सांसद डा. स्वर्णिम वाग्ले, प्रदेश सभा सदस्य हरिबहादुर चुमान र लिमिटेडका अध्यक्ष रामचन्द्र शर्माले उनीहरुलाई पुरस्कृत गरेका थिए ।
उद्यमशीलताको क्षेत्रमा कलम चलाएका पत्रकारहरुको छनोट गर्नको लागि सञ्चालक तारानाथ उपाध्यायको संयोजकत्वमा तीन सदस्य समिति गठन गरिएको थियो । सो समितिले छनोटको मापदण्ड पूरा गरी पुरस्कार दिन योग्य पत्रकारहरु छनोट गरि कम्पनीको बोर्ड समक्ष सिफारिस गरेको थियो ।
