भानु नगरपालिकाद्वारा २० जना उत्कृष्ट कृषकलाई सम्मान
भानु : तनहुँको भानु नगरपालिकाले उत्कृष्ट कृषक छनोट गरी सम्मान गरेको छ । नगरपालिकाले २० जना कृषकलाई नगद तथा प्रमाणपत्रसहित ‘नगर प्रमुख उत्कृष्ट किसान सम्मान’बाट सम्मान गरेको हो ।
पशुपालनतर्फ गाईभैंसी, बाख्रा, माछा, बंगुर, कुखुरा गरी पाँच विधामा सर्वोउत्कृष्ट र उत्कृष्ट कृषकको छनोट गरिएको थियो । सर्वोउत्कृष्ट कृषकहरूलाई १० हजार नगदसहित प्रमाणपत्र प्रदान गरिँदा उत्कृष्ट कृषकले ५ हजार नगदसहित प्रमाणपत्र प्रदान गरिएको छ ।
सम्मानित हुनेहरूमा बंगुर पालनतर्फ सर्वोउकृष्ट शारदा शाही र उत्कृष्टमा लोकबहादुर बसेल, माछापालनमा सर्वोउत्कृष्ट श्यामकुमार श्रेष्ठ र उत्कृष्ट पुष्पराज भट्टराई, बाख्रा पालनमा सर्वोत्कृष्टमा चिरञ्जि लौडारी, उत्कृष्टमा रामशरण गुरुङ, कुखुरापालनमा सर्वोउकृष्ट चिजा गुरुङ र उत्कृष्ट प्रमिला थापा, तरकारीमा सर्वोउत्कृष्ट छेनुर्पु तामाङ र शारदा श्रेष्ठलाई सम्मानित गरिएको छ ।
यसैगरी खाद्यान्नमा सर्वोत्कृष्ट रमा ओझा र उत्कृष्टमा विष्णुबहादुर थापा, मसलावालीतर्फ सर्वोउत्कृष्टमा कमला पाण्डे सम्मानित भएका छन् । मौरी पालनमा सर्वोउत्कष्ट प्रेमबहादुर अधिकारी र उत्कृष्ट भिमसेन अधिकारी, गाईभैंसी पालनमा सर्वोउत्कृष्ट महादेव अधिकारी र उत्कृष्ट दीपक बजगाई र फलफूलतर्फ सर्वोउत्कृष्ट पूर्णबहादुर आले र उत्कृष्ट गोविन्द घर्ती सम्मानित भएका छन् ।
पुरस्कृत किसानलाई भानु नगरपालिकाका प्रमुख आनन्दराज त्रिपाठी, उपप्रमुख उमा गोतामे र प्रमुख प्रशासकीय अधिकृत गौतम भण्डारी संयुक्त रूपमा नगद, प्रमाणपत्र र दोसल्ला ओढाई शनिबार सम्मान गरेका थिए । कार्यक्रममा नगर प्रमुख आनन्दराज त्रिपाठीले नेपाल कृषि प्रधान मुलुक भएपनि स्वदेशी उत्पादनले दैनिक आवश्यकता धान्न नसकेकोले किसानलाई उत्प्रेरणा दिई स्वदेशलाई आत्मनिर्भर बन्न टेवा पुगोस् भन्ने उद्देश्यले सम्मान गरिएको बताए ।
सम्मानित किसान छेनुर्पु तामाङले सम्मान पाउँदा उत्साह जागेको बताइन । किसान आफ्नो पेसाप्रति गर्व गर्नका लागि यस्ता सम्मानले मद्धत पुग्ने उनले बताए । भानु नगरपालिकाभित्र रहेका व्यवसायिक रूपमा खेती तथा पशुपालक गरिरहेका कृषकहरूलाई हौंसला प्रदान गरी पशुपालन तथा पशु उत्पादन र उत्पादकत्वमा वृद्धि गर्ने उद्देश्यले सम्मान गरिएको कृषि प्राविधिक तिलक कट्टेलले बताए ।
