“ठाडोभाका”को संरक्षणका लागि दमौलीमा तीन दिने प्रशिक्षण
दमौली : तनहुँको व्यास नगरपालिकाले लोपोन्मुख बन्दै गएको ठाडोभाका गीतको संरक्षणका लागि प्रशिक्षण सञ्चालन गरेको छ । गण्डकी प्रदेशको अमूल्य र मौलिक सांस्कृतिक पहिचान मानिने ‘ठाडोभाका’ लोकगीतलाई लोप हुनबाट बचाउन तथा नयाँ पुस्तामा हस्तान्तरण गर्ने उद्देश्यका साथ नगरपालिका प्रशिक्षण सञ्चालन गरेको हो ।
नगरपालिकाद्वारा स्थापित व्यास नगर प्रज्ञा प्रतिष्ठानले ‘लोक संस्कृतिको उत्थान एवं संरक्षण– हाम्रो अभियान’ भन्ने मूल नाराका साथ शुक्रबारदेखि दमौलीमा तीन दिने प्रशिक्षण कार्यक्रम सुरु गरिएको छ ।
प्रशिक्षणको शुभारम्भ गर्दै व्यास नगरपालिकाका प्रमुख एवं प्रज्ञा प्रतिष्ठानका कुलपति वैकुण्ठ न्यौपानेले मौलिक कला र संस्कृति नगरको अमूल्य सम्पत्ति भएको बताए । उनले भने, ‘हाम्रो पहिचान झल्काउने ठाडोभाकाजस्ता संस्कृतिहरू ओझेलमा पर्नु चिन्ताको विषय हो । यसको जगेर्ना र नयाँ पुस्तामा सीप हस्तान्तरण गर्नु नगरपालिकाको मुख्य दायित्व ठानेर हामीले यो विशेष पहल सुरु गरेका हौँ ।’
नगरपालिकाले भाषा, कला र संस्कृतिको संवद्र्धनलाई प्राथमिकतामा राखेर वार्षिक बजेट नै तय गरेको उपप्रमुख इन्दिरा दरैले बताइन् । उनले भनिन्, ‘स्थानीय संस्कृतिको संरक्षणले नगरको पर्यटन र पहिचानमा दीर्घकालीन टेवा पुग्ने हाम्रो विश्वास छ ।’
प्रतिष्ठानका उपकुलपति एवं वरिष्ठ साहित्यकार काशीनाथ न्यौपानेले ठाडोभाकालाई समाजको जीवन्त इतिहासको रूपमा व्याख्या गरे । पुस १९ गतेसम्म चल्ने यस प्रशिक्षणमा प्रख्यात गायक बुद्धिमान दुरा (धम्पु) सँगै सिता दुरा, अक्कल बिरही गुरुङ र अनिता गुरुङले प्रशिक्षण दिने बताइएको छ ।
लमजुङका स्व. भेडिखर्के साइँलोले जोगाएको यो विरासतलाई बचाउन नगरपालिकाले राष्ट्रिय लोक तथा दोहोरी गीत प्रतिष्ठान र दुरा सेवा समाजसँग सहकार्य गरेर समुदायमा आधारित संरक्षणका लागि पहल गरेको छ ।
