तनहुँ-१ उपनिर्वाचन : २३ हजार मतगणना, रास्वपाको अग्रता कायमै
भञ्ज्याङ न्यूज
प्रतिनिधिसभा सदस्यका लागि आइतबार तनहुँ निर्वाचन क्षेत्र नं. १ मा सम्पन्न उपनिर्वाचनको मतगणना कार्य जारी रहेको छ। २३ हजार मत गणना हुँदा राष्ट्रिय स्वतन्त्र पार्टी (रास्वपा) का उम्मेदवार डा स्वर्णिम वाग्लेले अग्रता लिइरहेका छन् ।
आइतबार राति ११:४५ बजेदेखि सुरु मतगणना भएकामा आज मध्यान्न १२ बजेसम्मको नतिजाअनुसार ११ हजार ६७७ मत प्राप्त गरी रास्वपाका उम्मेदवार डा. वाग्लेले ४ हजार ८९० मतले अग्रता लिइरहेका छन् ।
यस निर्वाचन क्षेत्रका ४२ वटा वडा मध्ये हालसम्म १७ वडाको मतपरिणाम सम्पन्न हुँदा वाग्लेले उक्त मत प्राप्त गरेका हुन् । नेपाली कांग्रेसका गोविन्द भट्टराइले ६ हजार ७८७ मत प्राप्त गरेका छन् भने नेकपा -एमाले) का र्सर्वेन्द्र खनालले ३ हजार ८०२ मत प्राप्त गरेका छन् ।
रास्वपाका उम्मेदवार स्वर्णिमले सत्ता गठबन्धन र नेकपा एमालेको गढ भनिएकै क्षेत्रबाट धेरै मत पाएका छन् । स्थानीय तह निर्वाचनमा १३ वटा वडाहरु रहेको भानु नगरपालिकाको प्रमुख र उपप्रमुख दुवै पद कांग्रेसले जितेको थियो । यहाँका ९ वटा वडा कांग्रेस, एमाले र स्वतन्त्रले दुइ-दुइ वटा वडा जितेका थिए ।
यसैगरी आँबुखैरेनी गाउँपालिकाका अध्यक्ष र उपाध्यक्ष दुवै पद नेकपा माओवादी केन्द्रका उम्मेदवारले जितेका थिए भने कांग्रेस दोस्रो भएको थियो । तर भानु र आँबुखैरेनीकै वडाहरुबाट रास्वपाले बढी भोट पाएको छ ।
तनहुँ क्षेत्र नं. १ अन्तर्गत ४२ वडामा ६३ हजार ७५७ मत खसेको थियो । जिल्ला समन्वय समितिको सभाहलमा दुइ ठाउँमा मतगणना कार्य जारी छ ।
