भानु साहित्य उद्यान गुरुयोजना स्वीकृत, रु. १ अर्ब लागत अनुमान
भानु : भानु साहित्य उद्यानको विस्तृत परियोजना प्रतिवेदन (गुरुयोजना–मास्टर प्लान) भानु नगरपालिकाको नगर कार्यपालिकाबाट स्वीकृत भएको छ । गुरुयोजनाअनुसार साहित्य उद्यानको पूर्ण निर्माणका लागि करिब एक अर्ब रुपैयाँ लागत अनुमान गरिएको छ ।
चालु आर्थिक वर्षमा संघीय शहरी विकास मन्त्रालयबाट २० करोड रुपैयाँ बजेट विनियोजन भएको छ । उक्त बजेटमार्फत शिखर कटेरीदेखि रम्घा डाँडासम्मको मोटर मार्ग स्तरोन्नति (कालोपत्रेसहित) तथा ५४ फिट उचाइको आदिकवि भानुभक्त आचार्यको विशाल प्रतिमा निर्माण गरिने नगरपालिकाले जनाएको छ ।
नगर प्रमुखको निरन्तर पहल तथा राष्ट्रपति रामचन्द्र पौडेलको विशेष चासोका कारण गत आर्थिक वर्षमै रम्घा डाँडामा रिटेनिङ वाल निर्माण र जग्गा अधिकरणको काम सम्पन्न भइसकेको छ । हालसम्म गुरुयोजना कार्यान्वयनका लागि करिब ४ सय रोपनी जग्गा प्राप्त भइसकेको नगरपालिकाले जनाएको छ ।
भानु साहित्य उद्यानलाई राष्ट्रिय गौरवको आयोजनाका रूपमा बहुवर्षीय योजनामा समावेश गर्न आवश्यक प्रक्रिया अगाडि बढाइएको नगरप्रमुख आनन्दराज त्रिपाठीले बताए । यस अभियानमा सहयोग र चासो देखाउनु हुने राष्ट्रपतिप्रति नगरपालिकाले आभार व्यक्त गरेको उनले बताए ।
भानु नगरपालिकाले भानु साहित्य उद्यानलाई साहित्य, संस्कृति र पर्यटनको केन्द्रका रूपमा विकास गर्ने लक्ष्य लिएको छ। उद्यान निर्माणसँगै आन्तरिक तथा बाह्य पर्यटक आकर्षित हुने र स्थानीय आर्थिक गतिविधि बढ्ने अपेक्षा गरिएको छ । भानु नगरपालिकाको समृद्धिको दिशामा एक ऐतिहासिक कदम भएको नगरप्रमुख त्रिपाठीले बताए ।
