तिहारलाई सयपत्री फूलको माला (फोटोफिचर सहित)

• नारायण खड्का (दमौली)

तिहार पर्व उज्यालो र फूलको पर्व हो । यो पर्वमा फूलको अधिक प्रयोग हुन्छ । त्यसमा पनि सयपत्री, मखमली लगायतका फूल विशेष रुपमा प्रयोग गरिन्छ ।

यमपञ्चक अर्थात तिहार पर्व अन्तरगत आज कुकुर तिहार मनाइदै छ भने आज नै लक्ष्मी पूजा पनि गरिदै छ । तिहारमा सप्तरंगी टीका, मखमली र सयपत्री फूलको माला नेपालीहरूका लागि परिपूरक हुन् । फूलको पर्व तिहारमा हिन्दु संस्कार अनुसार यमपञ्चकको पाँचैं दिन अर्थात भाइटिकाको दिन विशेष रुपमा प्रयोग गरिन्छ ।

यही पर्वलाई लक्षित गर्दै तनहुँको शुक्लागण्डकी नगरपालिका-९ का युवाहरुले सामुहिक रुपमा व्यवसायिक फूल खेती गरेका छन् । पछिल्लो समय तिहार लक्षित व्यावसायिक फूल खेती गर्ने किसान पनि हृवात्तै बढेका छन् ।

यहाँका किसानले सामूहिक र व्यक्तिगत रुपमा सयपत्री फुलाउन थालेपछि अहिले सबैको घर आँगन, खेतबारीमा फूल फुलेका छन् । सयपत्री जताततै ढकमक्क फुलेको छ । शुक्लागण्डकी-९ सुन्दरेस्थित सुरौदी खोला किनारमा गरिएको फूल खेती अहिले ढकमक्क भएर फुलेको छ ।

शुक्ला सुरौदी लाइभ स्टक एग्रोले दुइ रोपनीमा लगाइएको सयपत्री तिहार पर्व सुरु भएसंगै टिपेर माला उन्न कृषकहरु व्यस्थ छन् । उत्पादित फूलको माला बनाएर पोखरा लगायतका बजार क्षेत्रमा बिक्री वितरणका लागि लग्ने तयारी गरेको संस्थाका व्यवस्थापक कोष बहादुर तामाङ बताउँछन् ।

‘२ रोपनी क्षेत्रफलमा करिब ६० हजार रुपैयाँको लागतमा १५ सय बढि विरुवा रोपिएको थियो’, तामाङले भने, ‘विरुवा सबै सरे अहिले फूल पनि राम्रै फुलेको छ । कोरोना कहरका बारण बजार पाउँदैन कि भन्ने चिन्ता थियो तर, अहिले ग्राहक बारीमै आइपुग्दा माग अनुसारको फूल उपलब्ध गराउन सकेका छैनौं ।’

८ जना युवाले सामुहिक रुपमा व्यवसायिक रुपमा पशुपालन, तरकारी खेती समेत गरिएकोमा अहिले फूल खेतीबाट मात्रै करिब २ लाख रुपैयाँ आम्दानी गर्ने लक्ष्य लिएकोमा त्यो लक्ष्य पुरा हुँदै हामी निकै उत्साहित भएको कृषक तामाङ बताउँछन् ।

तिहार पर्वलाई लक्षित गरी अहिले कृषकहरुले आफैले माला तयार गरी प्रति माला १६० रुपैयाँ मूल्यमा बिक्री वितरणका लागि बजार पठाउने तयारी गरेका छन् । स्थानीयले फूलको माला तयार गर्न रोजगारी समेत पाएका छन् । तस्विर : नारायण खड्का/भञ्ज्याङ

सेयर गर्नुहोस्

प्रतिक्रिया दिनुहोस्

सम्बन्धित खवर