स्थानीय मुद्दा जान्ने उम्मेदवार हुँ : एमाले उम्मेदवार सिग्देल
दमौली : आगामि फागुन २१ गतेको प्रतिनिधिसभा सदस्य निर्वाचनका लागि तनहुँ क्षेत्र नम्बर २ का नेकपा एमाले उम्मेदवार केदार सिग्देलले आफू यस क्षेत्रका जनजीवन, समस्या र सम्भावनासँग नजिकबाट परिचित उम्मेदवार भएको दाबी गरेका छन् । प्रेस चौतारी नेपाल, तनहुँले शनिबार दुलेगौडामा आयोजना गरेको पत्रकार सम्मेलनमा उनले बाहिरबाट आएर राजनीति गर्ने व्यक्ति नभई यही भू–भागमा जन्मिएर हुर्किएको स्थानीय प्रतिनिधि भएको उल्लेख गरे ।
उम्मेदवार सिग्देलले तनहुँ–२ का सबै वडा र बस्ती आफूलाई चिनिएका स्थान भएको भन्दै जनताले भोग्दै आएका शिक्षा, स्वास्थ्य, सडक, खानेपानी, कृषि र रोजगारीसम्बन्धी समस्या आफूले नजिकबाट बुझ्दै आएको बताए । “म यहाँका जनता र भूगोलसँग अपरिचित छैन”, उनले भने, “स्थानीय आवश्यकता र सम्भावनालाई आधार बनाएर विकासका योजना अघि बढाउन सक्ने क्षमता मसँग छ ।”
उनले जनतासँग प्रत्यक्ष सम्पर्कमा रहेर काम गर्ने अभ्यास आफ्नो राजनीतिक पहिचान भएको बताउँदै विकासलाई नारा होइन, व्यवहारमा उतार्ने प्रतिबद्धता व्यक्त गरे । स्थानीय स्रोत, साधन र सम्भावनाको सदुपयोग गर्दै दिगो विकासको खाका तयार गरिने उनको भनाइ थियो ।
पत्रकार सम्मेलनमा सिग्देलले नेकपा एमालेको नीति, विचार र नेतृत्वले देशलाई स्थायित्व, विकास र सुशासनतर्फ लैजान सक्ने स्पष्ट दृष्टिकोण बोकेको दाबी गरे । आगामी निर्वाचनमा सबै वर्ग, समुदाय र क्षेत्रका मतदाताबाट व्यापक समर्थन प्राप्त हुनेमा आफू विश्वस्त रहेको उनले बताए ।
सांसदको भूमिकाबारे प्रष्ट धारणा राख्दै उनले प्रतिनिधिसभा सदस्यको मुख्य जिम्मेवारी बजेट बाँडफाँट गर्नु नभई नीति निर्माण, कानुन निर्माण र सरकारलाई सही दिशामा मार्गदर्शन गर्नु भएको बताए। “सांसदले बजेट बाँड्ने होइन, नीति बनाउने हो”, उनले भने, “क्षेत्रको आवश्यकता अनुसार सरकारलाई दबाब र मार्गदर्शन दिने काम प्रतिनिधिले गर्नुपर्छ ।”
उम्मेदवार सिग्देलले साधारण जीवनशैली र उच्च नैतिक मूल्यलाई आफ्नो राजनीतिक आचरणको आधार बनाउँदै आएको उल्लेख गर्दै जनप्रतिनिधिका रूपमा इमानदारी, पारदर्शिता र जवाफदेहितालाई सर्वोच्च प्राथमिकतामा राख्ने प्रतिबद्धता जनाएका छन् ।
