पहिराको पीडा : छानोबिहीन घरमा रात बिताउँदै वृद्ध दम्पती

ढुङ्गामाटोले बनेको घर । खरले छाएको छानो, तर अहिले घरमा त्यही खरको छानो पनि छैन । गत असारमा गएको पहिराले घर भत्किएको छ। छानो नभएको घरमा छन् एक वृद्ध दम्पती । कठयाङ्ग्रिद्रो चिसोमा छानोविहीन घरमा बस्न बाध्य छन् म्याग्दे गाउँपालिका-५ झिरुवासका ७५ वर्षीय धनबल गुरुङ र उहाँकी श्रीमती । भत्किएको टहरो, च्यातिएको गुन्द्री र केही थान च्यातिएको कपडासहित धनबल दम्पती विगत छ महिनादेखि कष्टकर जीवनयापन गर्न बाध्य हुनुहुन्छ । चिसोयाम, घरमा खाने अन्न र रातमा सुत्ने ओछयान नहुँदा धनबल भने श्रीमती र छोराछोरीका साथ भत्किएको टहरो हेर्दै बस्न बाध्य हुनुहुन्छ । उमेरले नेटो काटिसकेको बुढयौली शरीर लिएर केही उपाय नलागेपछि उहाँहरू जोखिमयुक्त टहरामा रात कटाउन बाध्य हुनुहुन्छ ।

चार छोरा र पाँच छोरीका बुबा धनबलका छोरा सवारी चालक भएतापनि आर्थिक अवस्था कमजोर भएपछि छानो फेर्न सक्नुभएको छैन। जसोतसो माइलो छोरा आफैले ऋण खोजेर साउदी गए पनि बाँकी दुइ छोराको जिम्मेवारी धनबलकै काँधमा छ ।

सरकारले गरिब विपन्नका नाममा विभिन्न कार्यक्रम ल्याए पनि आफूहरूलाई कसैले नहेरेको उहाँको गुनासो छ । सरकारले सुरक्षित नागरिक आवास कार्यक्रम स्थानीय तहमार्फत् सञ्चालन गर्दै आए पनि त्यो कार्यक्रम धनबलसम्म पुग्न सकेको छैन । “सुन्दा त सरकारले के के कार्यक्रम ल्याएको छ भन्छन्, तर हामी यसरी बसेको छ महिना बित्न लागिसक्यो”, उहाँले भन्नुभयो ।

गत असारमा पहिरो गए पनि कुनै राहत नपाएको उहाँको गुनासो छ । “खरको छानो भत्किएर घरको नाल र भाटा नै भाँचिएका छन्, अन्त जाने ठाउँ छैन जसोतसो यही बसेका छौ”, उहाँले भन्नुभयो, “कसैले सहयोग गर्दैनन्, कहाँ जानु र ?” सुरक्षित नागरिक आवास कार्यक्रमअन्तर्गत तत्काल खरको, अथवा कच्ची छानो हटाएर रु ५० हजार बराबरको जस्ताको छानो छाउने कार्यक्रम सरकारले लागू गरे पनि उहाँ यसबारेमा अनभिज्ञ हुनुहुन्छ ।

म्याग्दे गाउँपालिका-५ का वडाध्यक्ष शिवबहादुर आलेले पहिराले घर भत्किएपछि सुरक्षित स्थानमा र्सर्ने काम सम्बन्धित व्यक्तिको भएको प्रतिक्रिया दिनुभयो । “वडाध्यक्ष आफैले घर खोजेर राख्ने होइन, त्यो त सम्बन्धित व्यक्तिले गर्ने कुरा हो”, उहाँले भन्नुभयो । नागरिक आवास कार्यक्रमअर्न्तर्गत काम भइरहेको र त्यसले चाँडै पूर्णता पाउने उहाँले बताउनुभयो ।

सेयर गर्नुहोस्

प्रतिक्रिया दिनुहोस्

सम्बन्धित खवर