नेपाली कांग्रेस तनहुँमा महाधिवेशन प्रतिनिधिको दौड तीव्र, क्षेत्रीय अधिवेशनको कार्यतालिका सार्वजनिक
तनहुँ : नेपाली कांग्रेसको १५औँ महाधिवेशन नजिकिँदै जाँदा तनहुँमा महाधिवेशन प्रतिनिधि चयनको गतिविधि तीव्र बनेको छ । प्रतिनिधिसभा क्षेत्रीय अधिवेशनबाट महाधिवेशन प्रतिनिधि चयन हुने भएकाले दुवै निर्वाचन क्षेत्रमा आकांक्षीहरू सक्रिय हुन थालेका छन् ।
मौसम प्रतिकूलताका कारण यसअघि असोज १० गतेका लागि तय गरिएको क्षेत्रीय अधिवेशनको मिति परिवर्तन गरी तनहुँमा असोज १२ र १३ गते गर्ने तयारी गरिएको छ । कांग्रेस केन्द्रीय निर्वाचन समितिले प्रतिकूल मौसम भएका क्षेत्रमा सम्बन्धित जिल्ला तथा क्षेत्रीय कार्यसमितिसँग समन्वय गरी असोज १३ गतेभित्र प्रदेश तथा प्रतिनिधिसभा क्षेत्रीय अधिवेशन सम्पन्न गर्न निर्देशन दिएको छ ।
तनहुँमा काठमाडौंलगायत विभिन्न स्थानमा रहेर राजनीति गर्दै आएका नेतादेखि जिल्ला समितिका पदाधिकारी तथा सदस्य, वडा तहका नेताहरू र स्थानीयस्तरका आकांक्षीहरू महाधिवेशन प्रतिनिधिका लागि तयारीमा जुटेका छन् । क्षेत्रीय अधिवेशनले आगामी केन्द्रीय महाधिवेशनका लागि तनहुँबाट प्रतिनिधित्व गर्ने प्रतिनिधि चयन गर्ने भएकाले कांग्रेसभित्रको आन्तरिक राजनीतिक गतिविधि अहिले प्रतिनिधि छनोटमा केन्द्रित भएको छ ।
नेपाली कांग्रेसको १५औँ महाधिवेशन असोज १६ देखि १९ गतेसम्म हुने केन्द्रीय निर्वाचन समितिले जनाएको छ ।
१० पालिकामा नेतृत्व चयन
तनहुँका चार नगरपालिका र छ गाउँपालिकासहित १० वटै स्थानीय तहमा पालिका अधिवेशन सम्पन्न भइसकेको छ । अधिवेशनबाट व्यास नगरपालिकामा तुल्सीराम सापकोटा, शुक्लागण्डकीमा कृष्णप्रसाद रेग्मी, भानुमा राजन श्रेष्ठ र भीमादमा अर्विन श्रेष्ठ सभापतिमा निर्वाचित भएका छन् ।
त्यस्तै ऋषिङ गाउँपालिकामा याम सारु मगर, घिरिङमा सुमन थापा मगर, म्याग्देमा नरसिं राना, बन्दीपुरमा परशुराम अधिकारी, देवघाटमा अर्जुन अधिकारी र आँबुखैरेनीमा सोम दर्लामी सभापतिमा चयन भएका छन् ।
कांग्रेस तनहुँका सचिव लक्ष्मीभक्त खनालका अनुसार म्याग्दे र देवघाट गाउँपालिकामा मतदानमार्फत नेतृत्व चयन भएको हो भने बाँकी आठ पालिकामा सर्वसम्मत रूपमा नेतृत्व चयन गरिएको थियो । पालिका तहमा अधिकांश स्थानमा सहमति र सहकार्यबाट नेतृत्व चयन भएको उनले बताएका छन् ।
पालिका अधिवेशन सम्पन्न भएपछि अब प्रदेशसभा क्षेत्रीय अधिवेशन, प्रतिनिधिसभा क्षेत्रीय अधिवेशन हुँदै जिल्ला अधिवेशनतर्फ पार्टीको ध्यान केन्द्रित भएको छ ।
वडा नेतृत्वमा महिला शून्य
तनहुँ कांग्रेसको वडा अधिवेशनले भने पार्टीको तल्लो तहको नेतृत्वमा महिलाको प्रतिनिधित्वसम्बन्धी अर्को तथ्य पनि देखाएको छ । जिल्लाका १० वटै स्थानीय तहका ८५ वडामै पुरुष सभापति चयन भएका छन् ।
व्यासका १४, शुक्लागण्डकीका १२, भीमादका ९, भानुका १३, देवघाटका ५, आँबुखैरेनीका ६, ऋषिङका ८, घिरिङका ५, म्याग्देका ७ र बन्दीपुरका ६ वडामा सभापति चयन भएका हुन् ।
यसरी वडा तहको नेतृत्वमा एक जना पनि महिला सभापति नआउनुले कांग्रेस तनहुँको संगठनात्मक संरचनामा लैङ्गिक प्रतिनिधित्वको अवस्थाबारे प्रश्न उठाएको छ । वडा तहलाई पार्टी संगठनको आधारभूत संरचना मानिने भएकाले नेतृत्व चयनको यो परिणामलाई पार्टीभित्र महिला सहभागिताको दृष्टिले समेत हेर्न थालिएको छ ।
क्षेत्रीय अधिवेशनको कार्यक्रम सार्वजनिक
क्षेत्रीय अधिवेशनबाट प्रदेश प्रतिनिधि तथा क्षेत्रीय कार्यसमिति चयनको प्रक्रियासमेत अघि बढ्नेछ । निर्वाचन अधिकृत वरिष्ठ अधिवक्ता विष्णुप्रसाद शर्माले प्रकाशित गरेको कार्यक्रमअनुसार असोज १२ गते मतदाता नामावली प्रकाशन, दाबी–विरोध, उम्मेदवारी दर्ता तथा उम्मेदवारको अन्तिम नामावली प्रकाशनलगायत प्रक्रिया पूरा गरिनेछ ।
निर्वाचन कार्यक्रमअनुसार सोमबार बिहान १०ः३० बजेदेखि दिउँसो १ः३० बजेसम्म उम्मेदवारी दर्ता हुनेछ । त्यसपछि उम्मेदवारको प्रथम तथा दोस्रो नामावली प्रकाशन, दाबी–विरोध र उम्मेदवारी फिर्ताको प्रक्रिया पूरा गरी साँझ ५ बजे अन्तिम नामावली प्रकाशन गरिनेछ ।
असोज १३ गते बिहान ८ बजेदेखि दिउँसो २ बजेसम्म मतदान हुनेछ । क्षेत्र नं. १ को मतदान दमौली सभाहल र क्षेत्र नं. २ को मतदान बेलचौतारा सामुदायिक भवनमा हुने तय गरिएको छ । मतदान सकिएलगत्तै मतगणना गरी परिणाम घोषणा गर्ने कार्यक्रम छ ।
प्रतिनिधि छनोटसँगै बढ्दैछ आन्तरिक प्रतिस्पर्धा
यस्तै, क्षेत्रीय अधिवेशनमा महाधिवेशन प्रतिनिधि बन्ने आकांक्षीको संख्या बढ्दै जाँदा तनहुँ कांग्रेसभित्र आन्तरिक प्रतिस्पर्धा पनि तीव्र हुने देखिएको छ । विभिन्न क्लस्टर तथा समूहबाट आकांक्षीहरूले आफ्नो पक्षमा समर्थन जुटाउने प्रयास गरिरहेका छन् ।
यसअघि वडा र पालिका तहमा बनेका समीकरण, सहमति र नेतृत्व चयनको प्रभाव क्षेत्रीय अधिवेशनमा समेत पर्न सक्ने भएकाले प्रतिनिधि छनोटलाई कांग्रेसको आगामी जिल्ला तथा केन्द्रीय नेतृत्वका लागि महत्वपूर्ण चरणका रूपमा हेरिएको छ ।
तर, क्षेत्रीय अधिवेशनअघिसम्म उम्मेदवारहरूको अन्तिम सूची सार्वजनिक नभइसकेकाले कुन क्षेत्रमा कति आकांक्षी मैदानमा रहने भन्ने यकिन भइसकेको छैन । उम्मेदवारी दर्ता र नाम फिर्ताको प्रक्रिया पूरा भएपछि मात्रै प्रतिस्पर्धाको वास्तविक चित्र स्पष्ट हुनेछ ।
कांग्रेस केन्द्रीय निर्वाचन समितिले वर्षाका कारण प्रभावित क्षेत्रमा अधिवेशन प्रक्रिया अघि बढाउन स्थानीय अवस्थाअनुसार आवश्यक समन्वय गर्न निर्देशन दिएको छ ।
यससँगै तनहुँ कांग्रेसको अबको राजनीतिक गतिविधि १० पालिकाबाट प्रतिनिधिसभाका दुई निर्वाचन क्षेत्रतर्फ सरेको छ । क्षेत्रीय अधिवेशनबाट चयन हुने प्रतिनिधि र क्षेत्रीय नेतृत्वले असोज १६ देखि १९ गतेसम्म हुने १५औँ महाधिवेशनमा तनहुँको प्रतिनिधित्व गर्नेछन् ।
