कोभिड-१९ ले थलपरेको पर्यटनलाई चलायमान बनाउन भिमाद-पाथर्दी पदयात्रा
भञ्ज्याङ न्यूज
कोरोना भाइरस (कोभिड-१९) संक्रमण रोकथाम तथा न्यूनिकरणका लागि भन्दै गत चैत्र महिनादेखि गरिएको लकडाउनले पर्यटन क्षेत्र पनि नराम्रोसंग थलपरेको छ । कोभिडले सुस्ताएको पर्यटकीय गतिविधिलाई चलायमान बनाउन तनहुँमा विभिन्न कार्यक्रमहरु सञ्चालन गर्न थालिएको छ ।
कोभिड-१९ को प्रभावले रोकिएका पर्यटकीय गतिविधिलाई अगाडि बढाउने उद्देश्यले भिमाद नगरपालिका-९ भानुमती स्थित पाथर्दी सामुदायिक घरबास व्यवस्थापन समितिले पदयात्रा कार्यक्रम गरेको छ ।
भिमाद-६ स्थित भिमाद बजारबाट शुरु पदयात्रा पाथर्दीमा पुगेर टुङ्गएिको थियो । पदयात्राको उद्घाटन कार्यक्रममा गण्डकी प्रदेशका आर्थिक मामिला तथा योजनामन्त्री किरण गुरुङले पर्यटनलाई आर्थिक उपार्जनको माध्यम बनाउनुपर्नेमा जोड दिए । उनले पर्यटनबाटै समृद्धि सम्भव रहेकाले प्रदेश सरकारले पनि पर्यटन प्रवर्द्धनका लागि कार्यक्रम बनाएको बताए ।
कोभिड-१९ को प्रभावका कारण रोकिएका पर्यटन गतिविधि पुनःसञ्चालन गर्न पदयात्राको आयोजना गरिएको घरबास व्यवस्थापन समितिका अध्यक्ष शिवकुमार आलेले जानकारी दिए । पदयात्रामा १५० भन्दा बढीको सहभागिता रहेको थियो ।
‘कोभिडले पर्यटनका सबै गतिविधि रोकिए, अब विस्तारै पर्यटनका कार्यक्रम सञ्चालन गर्ने उद्देश्यले वडामा भएका पर्यटकीय गन्तव्यको प्रचारका लागि पदयात्रा गरेका हौ’, उनले बताए ।
पदयात्राका क्रममा सोही वडामा रहेको सिद्धगुफाको पनि भ्रमण गरिएको छ । एक सय नयाँ पर्यटकीय गन्तव्यको रूपमा सूचीकृत गुफामा विभिन्न पूर्वाधार निर्माण गरिएको छ । कोभिड-१९ कै समयमा गुफा क्षेत्रमा शौचालय, प्रतीक्षालय र रेलिङ निर्माण गरिएको छ । पूर्वाधार निर्माणका लागि संस्कृति, पर्यटन तथा नागरिक उड्डयन मन्त्रालयले रु २५ लाख उपलब्ध गराएको थियो ।
पदयात्रामा पुग्ने पदयात्रीलाई सोही ठाउँमा रहेको पाथर्दी सामुदायिक घरबासमा बास बस्ने व्यवस्था मिलाइएको छ । पाथर्दी गण्डकी प्रदेश सरकारले सञ्चालन गरेको मुख्यमन्त्री नमूना वातावरणमैत्री कृषि गाउँ हो ।
