प्रचण्डलाई कांग्रेसतिर ल्याउन जोड गरिरहेका छौं : नेता पौडेल
भञ्ज्याङ न्यूज
नेपाली कांग्रेसका नेता रामचन्द्र पौडेलले एमाले नेतृत्वको गठबन्धनबाट टुटाएर माओवादी केन्द्रका अध्यक्ष पुष्पकमल दाहाल प्रचण्डलाई कांग्रेसतिर ल्याउने कोसिस भइरहेको बताएका छन् ।
शहीद सप्ताहको अवसरमा कांग्रेस तनहुँले मंगलबार दमौलीमा गरेको वर्तमान अवस्थामा नेपाली कांग्रेसको भूमिका विषयक अन्तरक्रियामा नेता पौडेलले भने, ‘प्रचण्डलाई एमालेसँगको गठबन्धन टुटाएर आफूतिर ल्याउन कांग्रेसले जोड गरिरहेको छ ।’ उनले अहिले कांग्रेसको मुख्य ध्यान राष्ट्रपति प्राप्ति भएको समेत बताए ।
राष्ट्रपतिको आकांक्षी समेत रहेका नेता पौडेलले दुइ र दुइ जोड्दा पाँच हुने परिस्थिति आएको चर्चा गरेका छन् । अहिलेको राजनीतिक परिस्थितिलाई टिप्पणी गर्दै उनले भने, ‘गणितमा दुइ र दुइ जोड्दा चार हुन्छ, तर यहाँ त कहिले पाँच र कहिले तीन हुने अवस्था आएको छ ।’
पार्टी सभापतिले काठमाडौ आउन आग्रह गरेको भन्दै वरिष्ठ नेता पौडेल मंगलबार नै काठमाडौं फर्किएका छन् । अहिलेको अवस्थामा किन जिल्लातिर अलमलिएको भनेर सभापतिले फोन गर्नु भएकाले म आजै काठमाडौं फर्किन लागेको उनले बताएका छन् ।
निर्वाचन आयोगले फागुन २५ गते राष्ट्रपति निर्वाचनको मिति तय गरेको छ । राष्ट्रपतिको विषयमा राष्ट्रिय सहमति खोजिने माओवादी केन्द्रको निर्णय छ । तर, एमालेले सत्ता गठबन्धनभित्रको सहमतिअनुसार आफ्नो दलले राष्ट्रपतिको उम्मेदवार बनाउनुपाउनु पर्ने बताइरहेको छ ।
