आदिकवि भानुभक्त क्याम्पसमा फलफूलका विरुवा रोपण
भञ्ज्याङ न्यूज
तनहुँको व्यास-१ स्थित आदिकवि भानुभक्त क्याम्पसमा राष्ट्रिय वृक्षारोपण दिवस-२०७८ का अवसरमा फलफूलका विरुवा रुपण गरिएको छ । गण्डकी प्रदेश सभाका सदस्य डोवाटे विकले छात्रावास प्राङ्गणमा आँपको बिरुवा रोपेर वृक्षारोपण कार्यक्रमको शुभारम्भ गरेका थिए ।
उनले आफ्नो नेतृत्वमा १७ वर्षको अथक प्रयत्नपछि निर्माण सम्पन्न गरी छात्रावास भवनलाई क्याम्पसको जिम्मामा लगाई सञ्चालनमा ल्याइएको स्मरण गर्दै सांसद विकले सहिदको नामको उक्त छात्रावासमा तला थप गरी विपन्न गरिब र दलित तथा जनजाति परिवारका दुर्गमबाट उच्च शिक्षा अध्ययन गर्न इच्छा राख्ने विद्याथीहरूलाई शिक्षाको अवसर प्रदान गर्न आवश्यक सहयोग गर्ने बताए ।
कार्यक्रममा डिभिजन वन अधिकृत कोमल राज काफलेले क्याम्पसको वातावरण तथा हरियाली विकासका लागि कार्यालयले क्याम्पससँग सहकार्य गर्न सदा तत्पर रहेको बताए । क्याम्पस सञ्चालक समितिका अध्यक्ष ब्रम्हदत्त तिमिल्सेनाले ३० जना विद्यार्थीको आवास क्षमता भएको उक्त छात्रावासको क्षमता अभिवृद्धि गर्न पूर्वाधारमा स्थानीय प्रदेश सरकारबाट आर्थिक सहायता जुटाउन अत्यावश्यक भएको बताए ।
क्याम्पस हाताभित्र आप, लिचि, कागती लगायतका फलफूलका विरुवाहरु रोपिएको क्याम्पस प्रमुख महाप्रसाद हड्खलेलले जानकारी गराए ।
