तनहुँमा मानवअधिकार अनुगमन समिति गठन
भञ्ज्याङ न्यूज
कोभिड-१९ बाट सिर्जित जटिल परिस्थिती र मानवअधिकारको अवस्था अनुगमनका लागि तनहुँमा मानवअधिकार अनुगमन समिति गठन गरिएको छ । राष्ट्रिय मानवअधिकार आयोगको नेतृत्वको समितिमा नेपाल बार एसोसियसन, नेपाल पत्रकार महासंघ र गैरसरकारी महासंघको जिल्ला स्तरीय नेतृत्व सदस्य हुन्छन् ।
नेपाल बार एसोसियसन तनहुँ बारका अध्यक्ष भानुभक्त सुवेदीको अध्यक्षतामा बुधबार बसेको बैठकले मानवअधिकार अवस्था अनुगमन समिति गठन गर्ने निर्णय गरेको हो । समितिको सदस्यहरुमा नेपाल पत्रकार महासंघ तनहुँका अध्यक्ष उज्वल पौडेल र गैरसरकारी संस्था महासंघका अध्यक्ष प्रकाशचन्द्र भट्टराइ रहेका छन् ।
यस्तै, समितिको पहिलो बैठकले समितिको सदस्यहरुमा आदिवासी जनजाती महासंघका जिल्ला अध्यक्ष बसुन्धरा घर्ती, महिला मानवअधिकार रक्षक सन्जालकी कल्पना पौडेल, गैरसरकारी संस्था समन्वय समितिका महासचिव राजेश्वर हड्खले र दलित पत्रकार संघका अध्यक्ष सानेबहादुर नेपालीलाई थप गर्ने निर्णय गरेको छ ।
समितिले कोभिड-१९ का कारण सिर्जित विषम परिस्थिती र बन्दाबन्दीका कारण नागरिकको मानवअधिकारमा परेको असरका विषयमा जिल्लामा अनुगमन गर्ने छ । निषेधाज्ञाको समयमा पनि नागरिकको मानवअधिकारको संरक्षण र संबर्द्धन हुनु पर्ने हुँदा समितिले त्यसैबारेमा अनुमगन गर्ने संयोजक सुवेदीले बताए ।
