मुस्लिम धर्मावलम्बीले आज कुर्वान दिने पर्व बकर इद मनाउदै
भञ्ज्याङ न्यूज
मुस्लिम धर्मावलम्बीको दोस्रो महान् पर्व बकर इद (इदुल जोहा) आज हर्षोल्लासपूर्वक मनाउदै छन । इदुल फित्रअर्थात् रमजान पर्वको ७०औँ दिनमा बकर इद मनाउने धार्मिक विधि रहिआएको छ । बकर इदका अवसरमा आज सरकारले देशभर सार्वजिनक विदा पनि दिएकाे छ ।
तनहुँका मुस्लिम धर्मावलम्बीले कोरोना कहरका कारण सामाजिक दूरी सहित नुरी हन्फी जामे मस्जिदमा नमाज पढी एक आपसमा शुभकामना आदनप्रदान गरिएको ब्यास मुस्लिम सेवा समाजका सचिव मन्सुर अहमदले बताए । उनले कोरोना संक्रमण जोखिम कायमै रहेकाले स्वास्थ सुरक्षालाई ख्यालगरी इद मनाउन आग्रह गरेका छन ।
इस्लामिक पात्रोअनुसार १२औँ महिनाअर्थात् दिल हिज्जाको १०औँ दिन यो पर्व मनाउने गरिएको व्यास मुस्लिम सेवा समाजका अध्यक्ष सिद्धिक मियाले जानकारी दिए । यस दिन मुस्लिम धर्मावलम्बी बिहानै स्नान गरी नजिकैको मस्जिद वा इदगाहमा गई सामूहिक नमाज पढ्छन् । नमाज पढिसकेपछि एकापसमा अंकमाल गर्दै शुभकामना आदान प्रदान गरिन्छ । तर, कोरोना संक्रमण जोखिम कायमै रहेकाले यश वर्ष २५ जना भन्दा कम संख्यामा उपस्थित भइ नमाज पढिएको र सबैलाई स्वस्थ सुरक्षालाई ख्याल गरि घरमै वा मस्जिदमा उपस्थित भइ इद मनाउन अनुरोध गरिएको उनले बताए ।
आज देशभरका मस्जिद र इदगाहमा मुस्लिम धर्मावलम्बीको भीड लाग्ने गरे पनि यस वर्ष कोरोना भाइरसको सङ्क्रमण फैलन सक्ने भएकाले मुस्लिम आयोगलगायत निकायले विज्ञप्ति जारी गरी घरमै बसेर सुरक्षितरुपमा बकर इद मनाउन आह्वान गरेका छन् ।
हिजरी संवत्अनुसार १४३९ वर्ष पहिले अल्लाहको आदेशमा इब्राहिमले आफ्ना छोरा इस्माएल अलेह सलामलाई बलिदान गर्न तयार भएको सम्झनामा यो पर्व मनाउन थालिएको बताइन्छ ।
‘अल्लाहको आदेश इब्राहिमलाई तेरो नजिकको प्यारो चीज कुर्वान (बलिदान)दे भन्ने थियो, जसअनुसार इस्माएल अलेह सलामलाई बलिदान दिन तयार हुँदा अल्लाह आफैँ आएर परीक्षामा उत्तीर्ण भइस्, यो भेडालाई बलिदान गर भनी आदेश दिनुभयो, यही घटनाका आधारमा यो पर्व मनाउन शुरु भएको हो,’ पर्वको ऐतिहासिक पृष्ठभूमि रहेको अध्यक्ष मियाले बताए ।
मुस्लिम धर्म गुरु (मौलाना) रहमत अली ऐतिहासिक बकर इद पर्वको आधार बनेका इब्राहिमको वंशमा सन् ५७१ मा मक्कामा मोहम्मद सलल्ला जन्मिई निरन्तरता दिएको बताउँछन् । जसले यो पर्व एवं धर्मलाई पुस्तान्तरण गर्न महत्वपूर्ण योगदान गर्दै हदिस नामक धर्मग्रन्थको रचना गरेका थिए।
‘जुन ग्रन्थलाई अहिले मुस्लिम धार्मिक विद्यालय (मदरसा) मा समेत अध्ययन अध्यापन गराइन्छ, मक्कामा जन्मिनुभएका सलल्ला ५३ वर्षको उमेरपछि मदिनामा सर्नुभएको थियो, यही सम्झनामा अहिले पनि साउदी अरबमा पर्ने यी दुवै तीर्थस्थलमा ठूलो मेला लाग्ने गरेको छ”, उनले भने ।
यस पर्वका अवसरमा मक्का मदिना जानु शुभ मानिने भए पनि यस वर्ष कोरोनाका कारण अन्तर्राष्ट्रिय उडानसमेत सहज छैन । जसका कारण हजयात्री मक्का मदिना जान पाएका छैनन् । मक्का मदिना जान नपाएका हजयात्रीले समेत घरघरमै बकर इद मनाउने छन् ।
कुर्बानीको मासु तीन भागमा बाँडी वितरण गरिन्छ । एक भाग गरिब एवं विपन्न परिवारलाई, अर्को एक भाग आफ्ना आफ्ना इष्टमित्रलाई र तेस्रो भाग आफैंले खानुपर्ने मुस्लिम धार्मिक मान्यता छ ।
