व्यासनगर अस्पताल शुभारम्भ, भदौदेखि संचालन हुने

तनहुँको व्यास नगरपालिकाले नगर अस्पताको शुभारम्भ गरेको छ । वडा नं. १० स्थित दुम्सीमा शुक्रबार एक कार्यक्रमका बीच व्यासनगर अस्पताल शुभारम्भ गरिएको छ । नगरप्रमुख वैकुण्ठ न्यौपानेले रक्तचाप परिक्षण गरी अस्पतालको शुभारम्भ गरेका हुन् । अस्पताल निर्माण कार्यको काम सम्पन्न भइसकेपनि शुक्रबार अस्पतालको शुभारम्भ गरी कोभिड अस्पताल सेवा शुरु गरिएको हो ।

नगरपालिकाले नीति तथा कार्यक्रममा समावेश गरेको अस्पताल यस अघिको सहरी स्वास्थ्य एकाइमा स्थापना गरेको बताइएको छ । अस्पतालको शुभारम्भ गर्दै नगरप्रमुख न्यौपानले ग्रामीण क्षेत्रलाई लक्षित गरेर नगर अस्पतालको सेवा शुभारम्भ गरेको बताए । अस्पताल सुरुवातसँगै पीसीआर टेष्टका लागि धेरै दिन कुर्नुपर्ने समस्या अब हट्ने उनले विश्वास व्यक्त गरे ।

फोहोर ब्यबस्थापनका लागि ब्यास-१० ले नै सहयोग गरेको हुँदा अस्पताल पनि यसै वडामा ल्याइएको उनले बताए । वडाध्याक्ष तुलसीराम सापकोटाको अध्यक्षतामा आयोजित कार्यक्रममा व्यास नगरपालिकाकी उपप्रमुख मिरा जोशी, वडा नं. १, २, ५, ७, १२, १३ र १४ नम्बरका वडाध्यक्ष लगायतको सहभागीता रहेको थियो ।

२५ बेड क्षमताको अस्पतालमा हाल ५ बेड तयार भएको र बृहत रूपमा भदौ १ गतेदेखि सञ्चालन हुने बताइएको छ । अस्पताल शुरु भए पनि सबै सुविधा भने शुरु भैसकेको छैन । यस अघि बसेको नगर कार्यपालिका बैठकले अस्पतालका लागि आवश्यक उपकरण टेण्डरमार्फत खरिद गर्ने निर्णय गरेको छ । पिसियार ल्याब छिट्टै संचालन गरिने व्यास नगरपालिकाका स्वास्थ्य शाखा प्रमुख प्रमोद सोतीले जानकारी दिए ।

सेयर गर्नुहोस्

प्रतिक्रिया दिनुहोस्

सम्बन्धित खवर