कांग्रेस तनहुँको वडा अधिवशेन तोकिएकै मितिमा, अधिवेशन केन्द्रित छलफल तीब्र

नेपाली काँग्रेस तनहुँले भदौ १८ गते गाउँ तथा नगरपालिकाको वडा अधिवेशन सुरु गरेर पार्टीको १४औँ महाधिवेशन औपचारिक प्रक्रिया प्रारम्भ गर्ने भएको छ । पार्टीको सबैभन्दा तल्लो र औपचारिक निकाय वडा अधिवेशनको प्रारम्भ गरेर महाधिवेशनको शुभारम्भ गर्ने तयारी गरिएको हो ।

पार्टीको केन्द्रीय निर्वाचन समितिले अब महाधिवेशनको प्रक्रिया सुरु हुने उल्लेख गर्दै निर्वाचन पर सर्ने या अन्य कुनै पनि खालको द्विविधा नरहेको स्पष्ट पारेको छ । नेपाली काँग्रेसले अहिलेसम्म ५६ जिल्लाका क्रियाशील सदस्यताको विवाद समाधान गरी ५३ जिल्लामा जिल्ला निर्वाचन अधिकृत खटाइसकेको छ । जिल्लामा पुगेका निर्वाचन अधिकृतले पार्टीसँग समन्वय गरेर वडा अधिवेशन प्रक्रिया सुरु गरिसकेको जानकारी निर्वाचन समितिले जनाएको छ ।

काँग्रेसको निर्वाचन समितिले वडास्तरको अधिवेशन १८ गते र त्यस दिन सम्पन्न हुन बाँकी रहेको अवस्थामा दुइ चार दिन पर सारेर पनि निर्वाचन गराइने जनाएको छ । पार्टीको निर्वाचन समितिका संयोजक महेन्द्र यादवले केन्द्रीय निर्वाचन समितिलाई जानकारी गराएर जिल्ला निर्वाचन अधिकृतले भदौ १८ गतेपछि पनि वडा स्तरको अधिवेशन सम्पन्न गर्ने जानकारी दिनु भयो ।

केन्द्रीय निर्वाचन समितिले गाउँपालिका तथा नगरपालिका स्तरको अधिवेशन हुनुअघि वडाको अधिवेशन सम्पन्न गर्न निर्देशन गरेको हो । निर्वाचन समितिले भदौ २७ गते अघि नै सबै वडाको अधिवेशन पूरा गरिने जनाएको छ । भदौ २७ गते पार्टीको नगर गाउँस्तरको अधिवेशन गर्ने काँग्रेसको पूर्वनिर्धारित कार्यतालिका छ ।

काँग्रेसको नगर तथा गाउँपालिका स्तरको अधिवेशनमा वडाबाट निर्वाचित भएका क्षेत्रीय प्रतिनिधि र पार्टीको वडाध्यक्ष मतदाता हुने भएकाले पनि गाउँ तथा नगरको अधिवेशन अगावै वडास्तरको अधिवेशन सम्पन्न गर्नुपर्ने भएको हो ।

यस्तै, यस अघि घोषित केन्द्रीय तालिका अनुसार नै वडा र पालिकाको चुनाव गर्ने गरी नेपाली कांग्रेस तनहुँले तयारी थालेको छ । पार्टी जिल्ला कार्यालय तनहुँमा आइपुगेका मतदान अधिकृत फणिन्द्र कोइरालाले मतदान प्रणालीबारे जिल्ला नेतृत्वलाई जानकारी गराएका छन् । उनले सहायक मतदान अधिकृतका रुपमा डिएलए तनहुँका अध्यक्ष चन्द्रकान्त वाग्ले र प्राध्यापक केशवराज काफ्लेलाई सहायक अधिकृत नियुक्त गरेका छन् ।

अधिकृत कोइरालाले नेतृत्वसँग चुनावी प्रक्रियाका विविध विषयमा छलफल समेत गरेको र आफूहरुले आवश्यक सबै सहायोगको प्रतिवद्धता जनाएको पार्टी जिल्ला कार्यवाहक सभापति जीतप्रकाश आलेले बताए । अहिले जिल्लाका सबैजसो भागमा कांग्रेस नेताहरु चुनाव केन्द्रित छलफलमा अघि बढिरहेका छन् ।

सेयर गर्नुहोस्

प्रतिक्रिया दिनुहोस्

सम्बन्धित खवर