तनहुँमा मतदाता नामावली संकलन गरिने

जिल्ला निर्वाचन कार्यालय तनहुँले जिल्लाका नौ वटा पालिकामा दुइ चरणमा मतदाताको नामावली संकलन गर्ने भएको छ । कार्यालयले यही मंसिर १७ गतेदेखि मतदाता नामावली संकलन गर्ने गरी तयारी गरेको जानकारी गराएको छ । कार्यालयले मंसिर १७ गतेदेखि २६ गतेसम्म भिमाद नगरपालिका, घिरिङ गाउँपालिका, देवघाट गाउँपालिका, बन्दिपुर गाउँपालिका र म्याग्दे गाउँपालिकाबाट मतदाता नामावली संकलन गर्ने भएको छ । यस्तै कार्यालयले मंसिर २९ देखि पुस ९ गतेसम्म ऋषिङ गाउँपालिका, शुक्लागण्डकी नगरपालिका, आँवुखैरेनी गाउँपालिका, भानु नगरपालिकाको कार्यालयबाट फोटोसहितको मतदाता नामावली संकलन गर्ने तयारी गरेको जिल्ला निर्वाचन अधिकृत हर्रि्रसाद ढकालले जानकारी गराए ।

कार्यालयले व्यास नगरपालिकाको हकमा भने जिल्ला प्रशासन कार्यालय तनहुँ र जिल्ला निर्वाचन कार्यालय रहेको दर्ता स्थलबाट मतदाता नामावली संकलन हुँदै आएको कार्यालयले जनाएको छ ।

निर्वाचन कार्यालयले जिल्लाको स्थायी नागरिक विभिन्न पेशा र रोजगारको शिलशिलामा तनहुँमा बसोबास गरेका नागरिकले पनि आफ्नो स्थायी बसोबासको स्थानमा मतदाता नामावलीरहने गरी जिल्ला निर्वाचन कार्यालयमा गएर मंसिर १७ गतेदेखि नामावलीमा नाम दर्ता गर्न सकिने भएका छन् ।

निर्वाचन कार्यालयले बुधबार राजनीति दल र सरोकारवालासंग मतदाता नामावली संकलन गर्ने विषयमा छलफल गरी सहयोग गरिदिन आग्रह गरेको थियो । सो अवसरमा प्रमुख जिल्ला अधिकारी विश्वप्रकाश अर्यालले मतदाता नामावली संकलन अभियानमा सबैले साथ सहयोग गर्नुपर्ने बताए । उनले भने ‘कोही नछुट्ने गरी मतदाता नामावली संकलन अभियान सुरु हुँदैछ ।’ जिल्लामा गत कार्तिक मसान्तसम्म २ लाख २९ हजार ८६३ मतदाता सूचिकृत भएको जिल्ला निर्वाचन कार्यालय जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर