बिद्यार्थी मृत्यु प्रकरण : तनहुँको बाइसजागरमा टायर बालेर डुम्रे-बेशिसहर सडक अबरुद्ध
भञ्ज्याङ न्यूज
लमजुङको सुन्दरबजार नगरपालिका-९ फ्युचरस्टार आबसीय माध्यमिक बिद्यालयको कक्षा १० मा अध्यायनरत बर्ष१८ का सनिज श्रेष्ठको मृत्यु प्रकरणलाई लिएर डुम्रे-बेशिसहर सडक खण्ड अवरुद्ध भएको छ ।
विद्यार्थी श्रेष्ठको मंगलबार पौडी खेल्ने क्रममा मर्स्याङ्दी नदिमा डुबेर मृत्यु भएको थियो । बिद्यार्थीको मृत्यु प्रकरणलाई लिएर तनहुँको भानु नगरपालिका-९, बाइसजाँगरका स्थानीयवासिन्दाले सडकमा टायर बालेर डुम्रे-बेशिसहर सडक अवरुद्ध गरेका हुन । स्थानीयको प्रदर्शनले डुम्रे-बेंसीसहरको तनहुँ खण्ड र प्रशासनको निषेधाज्ञाले लमजुङ खण्डमा यातायात ठप्प छ ।
जिल्ला प्रशासन कार्यालय लमजुङले सीमा क्षेत्र लमजुङ प्रवेश पाउदीदेखि सिउँडीबारसम्म बुधबार बिहान ६ बजेदेखि अनिश्चितकालका लागि निषेधाज्ञा जारी गरेको छ ।
भानु-९, बाइसजाँगर घर भएका विद्यार्थीका आफन्त र स्थानीयले बाइसजाँगर चोकमा टायर बालेर सडक अवरोध गरेको स्थानीय अजिमा खातुनले बताइन । सडक अवरोधले बुधबार बिहानैदेखि यातायात ठप्प छ । डुम्रेबाट आएका सवारी साधन बाइसजाँगरमा रोकिएका छन् । निषेधाज्ञा जारी गरिएको सिउँडीबार क्षेत्र पनि ठप्प छ ।
होस्टेलका विद्यार्थीलाई पौडी खेल्न लगेको, आफन्तलाई थाहै नदिई शव लगेको भन्दै स्थानीयले विरोध गरेका छन् । उनीहरुले विद्यालयका संस्थापक बाबुराम पौडेलसहित पौडी खेल्न सँगै गएका शिक्षक र विद्यार्थीमाथि सत्यतथ्य छानबिन गरी कारबाही गर्न माग गरेका छन् ।
लमजुङका प्रहरी प्रमुख प्रहरी नायव उपरीक्षक कृष्णबहादुर कार्कीले होस्टेल वार्डेन सरोज ओलिया र एकजना विद्यार्थीलाई नियन्त्रणमा लिएको बताएका छन् ।
घटनाको विषयलाई लिएर स्थानीयले संघर्ष समिति बनाएका छन् । घटनाको विरोधमा प्रदर्शनमा उत्रिएका पीडितपक्षले विद्यालयको २ वटा बस, एउटा भ्यान र स्कुलको गेट समेत तोडफोड भएको प्रहरीले जनाएको छ । प्रदर्शनले उग्र रुप लिँदै गएपछि प्रहरीले मंगलबार साँझ अश्रुग्यास प्रहार गर्नुका साथै हवाई फायर र लाठीचार्ज गरेको थियो ।
