दमौली बजार क्षेत्रको तारलाई भूमीगत गराइने

तनहुँको व्यास नगरपालिकाले बजार क्षेत्रका वडाहरुमा रहेका विद्युत तथा अन्य सेवा प्रदायक संस्थाका तारहरुलाई भूमीगत गराउने निर्णय गरेको छ । नगरप्रमुख बैकुण्ठ न्यौपानको अध्यक्षतामा बुधबार बसेको नगर कार्यपालिकाको बैठकले उक्त निर्णय गरेको हो ।

बैठकले नगरपालिकाको मुख्य बजार क्षेत्रका वडा नं. १, २, ३, ४ का विद्युत लाइन र दुरसञ्चार सेवा प्रदायक संस्थाका तारहरुलाई भूमीगत गर्न नेपाल विद्युत प्राधिकरण र सम्बन्धित निकायलाई अनुरोध गर्ने निर्णय गरेको प्रमुख प्रशासकीय अधिकृत हरिराम नागिलालले जानकारी गराए ।

कार्यपालिका बैठकले पत्रकार महासंघ तनहुँको सिफारिसका आधारमा यस अघि गरिएको पत्रकार स्वास्थ्य वीमालाई निरन्तरता दिने निर्णय गरेको छ । नगरपालिकाले नगर क्षेत्रका टोल विकास संस्थाहरु बाट सञ्चालित लिफि्टङ खानेपानी र सडक बत्तिको विद्युत महसुलको ५०% नगरपालिकाले सम्बन्धित टोल विकास संस्थालाई अनुदान दिने निर्णय गरेको छ । उक्त बैठकले आर्थिक ऐन, २०७९/०८० को व्यवस्था अनुसार भवन निर्माण कन्सल्टेन्सीमा लाग्ने दस्तुर कार्यान्वयन नगर्ने निर्णय गरेको छ ।

त्यस्तै, नगरपालिकाले वडा नम्बर १० स्थित मंगली गैह्रामा सरसफाई केन्द्र बनाउने निर्णयबाट पछि हटेको छ । स्थानीयको विरोध भएपछि नगरपालिकाले उक्त ठाउँमा सरसफाई केन्द्र बनाउने निर्णय स्थगित गर्ने निर्णय गरेको छ ।

उक्त स्थानमा सरसफाई केन्द्र बनाउनका लागि नगरपालिकाले जग्गा खरिद प्रकृया अगाडी बढाएको थियो । त्यसका लागि संघ सरकारसँग स्वीकृति समेत मागिएको थियो । तर स्थानीयवासीले कुनै पनि हालतमा सरसफाई केन्द्र बनाउन नदिने अडान लिएका थिए ।

नगरपालिकाको बुधबार बसेको कार्यपालिका बैठकले स्थानीयहरुको गुनासोका आधारमा सो जग्गा खरिद प्रकृया स्थगितगरि वैकल्पिक जग्गा खरिद प्रकृया अघि बढाउने निर्णय गरेको प्रमुख प्रशासकीय अधिकृत नागिलाले बताए ।

त्यस्तै, नगर कार्यपालिकाका सदस्यहरु र स्थानीय प्रतिनिधि समेत सफल सरसफाई केन्द्रमा यस महिनाभित्र अध्ययन अवलोकन भ्रमणमा जाने निर्णय बैठकले गरेको छ । नगरपालिकाले नगरका शैक्षिक बेरोजगार र वैदेशिक रोजगारबाट फर्किएका युवा व्यवसायीहरुलाई अनुदान दिने प्रकृया अघि बढाउने भएको छ ।

व्यास नगरपालिका भित्र प्रतिनिधिसभा निर्वाचन क्षेत्र नं. १ अन्तर्गतका वडाहरुमा सुरक्षित आवास अन्तरगत २०० घर थप भएकाले सो घरहरु छनौट प्रकृया अघि बढाउने निर्णय गरेको छ । नगरपालिकाले हिमालय आँखा अस्पताल पोखरासँग सहकार्य गरी नगरपालिकाको स्वास्थ्य केन्द्रमा आँखा उपचार केन्द्र स्थापना गर्ने निर्णय गरेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर