भेटेरिनरी अध्ययनका लागि म्याग्दे गाउँपालिकाले दियो विद्यार्थीलाई छात्रवृत्ति

तनहुँको म्याग्दे गाउँपालिकाले भेटेरिनरी (१८ महिने) अध्ययन गर्ने विद्यार्थीलाई ५० प्रतिशत छात्रवृत्ति दिएको छ । पालिका भित्रका गरिव तथा विपन्न वर्गको छात्रछात्रालाई शिक्षामा सहज पहुँच र भेटेरिनरी शिक्षामा आकर्षण गर्ने उद्देश्यले पालिकाको स्वीकृत बजेटबाट कुल रकममा ५० प्रतिशत छात्रवृत्ति दिएको हो ।

गाउँपालिकाको १२औ गाउँसभाबाट स्वीकृत बजेट तथा पुस महिनाको कार्यपालिका बैठकको निर्णयअनुसार पालिकाको पशु शाखाले जनगणपति माध्यामिक विद्यालयबाट आर्थिक वर्ष २०७८/०७९ मा भर्ना भएको ११ जना विद्यार्थीलाई छनोट गरी लाग्ने शुल्कमा ५० प्रतिशत छात्रवृत्ति दिएको लेखा अधिकृत नवराज प्रोख्रेलले बताए ।

गाउँपालिकाका अध्यक्ष श्रीप्रसाद श्रेष्ठले स्थानीय व्यक्तिले भेटेरिनरी पढ्नका लागि छात्रवृत्ति अनुदान कार्यक्रम अन्र्तगत छात्रवृत्ति दिएको बताए । पालिकामा आवश्यक जनशक्ति बाहिरबाट ल्याउनुपर्ने तर स्थानीयस्तरमा जनशक्ति अभाव भएकाले गाउँपालिकाले यो कार्यक्रम अगाडि ल्याएको अध्यक्ष श्रेष्ठले बताए ।

उनले भने, ‘प्राविधिक शिक्षामा विद्यार्थीको आकर्षण ल्याउन र यसको महत्व बुझाइ आत्मनिर्भर बनाउने उद्देश्य अनुरुप हामीले छात्रवृत्ति दिएका हौ । ”प्राविधिक शिक्षा हासिल गरिसकेपछि कोही पनि वेरोजगार बस्नुपर्ने अवस्था हुँदैन’, अध्यक्ष श्रेष्ठले भने, ‘गाउँपालिकाले स्थानीय विद्यार्थीलाई यो शिक्षाको महत्व दर्शाउन यो आर्थिक वर्षमा ११ जना विद्यार्थीलाई अनुदानको व्यवस्था गरेका छौ र यो कार्यक्रम निरन्तर रहनेछ ।’

जनगणपति माध्यामिक विद्यालयमा प्रि-डिप्लोमा भेटेरिनरी (१८ महिने) कक्षा सञ्चालन भएसँगै यहाँ उक्त विषय पढ्ने विद्यार्थीको आकर्षा बढेको छ । पालिकाले भेटेरिनरी पढ्न लाग्ने कुल खर्च ५० हजार मध्येको ५० प्रतिशतले हुन आउने रकम २५ हजारको दरले ११ जना विद्यार्थीको २ लाख पचहत्तर हजार रुपैयाँ पालिकाबाट दिइने भएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर