म्याग्दे गाउँपालिका-२ मा गरिवी निवारणका लागि व्यवसाय सचेतना कार्यक्रम
भञ्ज्याङ समाचारदाता/म्याग्दे
‘सिप सिकौं, व्यवसाय गरौ, उद्यम बनौ’ भन्ने मुल नाराका साथ म्याग्दे गाउँपालिका-२ मा गरिवी निवारणका लागि लघु उद्यम विकास कार्यक्रम (मेड्पा) अन्तर्गत व्यवसाय सचेतना कार्यक्रम सम्पन्न गरिएको छ । स्थानीय स्तरमा नै सिप सिकेर आत्मनिर्भर बनाउने उद्देश्यले गाउँपालिकाले कार्यक्रम संचालन गरेको हो ।
सिप सिकेर आत्मनिर्भर बन्ने मुख्य लक्ष्य राखेका कार्यक्रममा सहभागिहरुलाई विभिन्न विधामा प्रशिक्षण दिईएको थियो । समाजका विपन्न तथा आर्थिक वर्गलाई उत्पादन र सीपसँग जोडेर गरिवी निवारणका लागि लघु उद्यम विकास कार्यक्रम (मेड्पा)ले विभिन्न कार्यक्रम गर्दै आईरहेको छ ।
वडा नं. २ मा सञ्चालित कार्यक्रममा सहभागिहरुलाई व्यवसाय कसरी गर्ने विषयमा सहजिकरण गरिएको कार्यक्रमका फोकल पर्सन प्रदीप न्यौपानेले बताए । कार्यक्रममा २६ जना स्थानीयको सहभागिता रहेको र सहभागिलाई पहिला चरणमा प्रशिक्षण दिने र पछि व्यवहारिक तालिम दिईने उनले बताए ।
कार्यक्रम अन्तर्गत सहभागीहरुलाई अचार बनाउने, धुप, अगरवत्ति लगायतका घरेलु सामाग्रि तयार गर्ने तालिम दिइने र तालिम पश्चात आत्मनिर्भर बन्न सहयोग पुग्ने कार्यक्रमको मुख्य उद्देश्य रहेको न्यौपानेले बताए ।
सचेतना कार्यक्रममा राजकुमार श्रेष्ठले सिपको बारेमा प्रशिक्षण दिएका थिए । सीप नै जीवनको प्रमुख आधार बन्ने हुँदा सीपलाई सानो सोच्न नहुने उनले बताए । आठ दिनसम्म चल्ने व्यवसाय सचेतना कार्यक्रममा व्यवहारिक कक्षा शुरु हुने न्यौपानेले बताए । अभिमुखीकरणसंगै सीपमा निख्खार ल्याउन त्यसको प्राक्टिकलमा ध्यान दिइने र सोही अनुसार कार्यक्रम सञ्चालन गरिने न्यौपानले बताए।
