एनप्याब्सन तनहुँको दमौलीमा दशौं खेलकुद महोत्सव

निजी विद्यालयको छाता संस्था एनप्याब्सन तनहुँले दमौलीमा शुक्रबारदेखि दशौं खेलकुद महोत्सव सञ्चालन गरेको छ । विद्यार्थीमा रहेका प्रतिभा प्रस्फूटन गर्ने उद्देश्यसहित व्यास नगरपालिका-३ विपी वनवाटिका खेलमैदानमा खेलकुद महोत्सव सञ्चालन गरेको हो ।

खेलकुद महोत्सवमा एनप्याब्सनसँग आबद्ध २७ विद्यालयको सहभागिता रहेको छ ।

शनिबारसम्म सञ्चालन हुने महोत्सवमा २२ विधामा पाँच सय भन्दा बढी विद्यार्थीले प्रतिस्पर्धा गर्ने एनप्याब्सनका सहसचिव एवं खेलकुद संयोजक विश्वास केसीले बताए ।

खेलकुद महोत्सवमा एथलेटिक्सतर्फएक सय मिटर, दुइ सय मिटर, चार सय मिटर, आठ सय मिटर दौड, लङजम्प, हाइजम्प, सटपुट र भलिबल खेलमा प्रतिस्पर्धा हुनेछ ।

वि.सं. २०७७ र २०७८ मा कोरोना कहरका कारण खेलकुद महोत्सव सञ्चालन हुन सकेको थिएन । यसअघि आठौ र नवौं खेलकुद महोत्सवको उपाधि व्यास नगरपालिका-५ स्थित ग्रिनस्टार बोर्डिङ स्कूलले जितेको थियो ।

यस्तै, उक्त खेलकुद महोत्सवको शुभारम्भ गर्दै प्रतिनिधिसभा सदस्य एवं पूर्वमन्त्री शंकर भण्डारीले खेलकुदले विद्यार्थीको शारीरिकका अलवा मानसिक विकासमा सहयोग पुग्ने बताए । आजका बालबालिका भोलिका कर्णधार रहेको बताउँदै भण्डारीले खेलकुदले मानिसलाई अनुशासित बनाउने उल्लेख गरे ।

सेयर गर्नुहोस्

प्रतिक्रिया दिनुहोस्

सम्बन्धित खवर