शुक्लाका युवाको अभियान : सयौंको सहभागितामा सरसफाई र घाँस रोपण (तस्विर सहित)
भञ्ज्याङ न्यूज
तनहुँको शुक्लागण्डकी नगरपालिकाको सक्रियतामा वृहत् सरसफाई तथा घाँस रोपण अभियान सञ्चालन गरिएको छ ।
सुशासन र समृद्ध शुक्लागण्डकी निर्माणको लागि युवा अभियानले शनिबार बिहान शुक्लागण्डकी-९ स्थित मरेतरामा रहेको गौं संरक्षण केन्द्र परिसरमा वृहत सरसफाई तथा घाँस रोपण अभियानको शुभारम्भ गरेको हो ।
“सुशासन र समृद्ध शुक्लागण्डकी निर्माणको लागि युवा अभियान’ भन्ने नाराका साथ सञ्चालन गरिएको यस अभियानमा शुक्लागण्डकीका विभिन्न क्षेत्रमा आवद्ध करिब ७०० जनाको सहभागिता रहेको अभियानका कार्यक्रम संयोजक विज्ञान भण्डारीले जानकारी गराए ।
‘नौलो अयासको अनुभव आज शुक्लागण्डीमा सुरु गरिएको छ’, संयोजक भण्डारीले भने, ‘शुक्लगाण्डीको सुशासन र समृद्धका लागि हामी युवाहरुले यो अभियानका शुभारम्भ गरेका छौं, पहिलो दिननै निकै उत्साहजनक सहभागिता रहेको छ । आज छुट्नु भएकाहरुलाई अर्को कार्यक्रम सहभागिताका लागि अनुरोध गरेका छौं । हामी यो अभियानलाई प्रत्येक शनिबार ७ बजेदेखि निरन्तरता दिनेछौं ।’
बेथिति र अनियमिता विरुद्ध कडा रुपमा औला उठाउँदै अगाडि बढेको अभियानले नगरपालिकाको वडा नं. ९ स्थित मरेतरामा रहेको गौ संरक्षण केन्द्र परिसरमा शुक्लागण्डकी नगरपालिकाका विभिन्न क्षेत्रमा आवद्ध व्यक्ति युवा, सुरक्षाकर्मी, राजनीतिककर्मीहरुको सहभागितामा सरसफाई तथा घाँसका विरुवा रोपण गरिएको छ ।
गौ संरक्षण केन्द्रमा घाँसको अभावमा गाईहरु मरिरहेको अवस्थालाई मध्यनजर गर्दै युवा अभियानले घाँस रोप्ने कार्यक्रम सञ्चालन गरिएको बताइएको छ ।
गौ संरक्षण केन्द्रमा गाईको संरक्षण भन्दा पनि गौमातालाई भोकभोकै राखेर सजाय दिइएको र्सवत्र गुनासो बढ्को छ । त्यहाँ लगिएको गाईबस्तुलाई आगामी दिनमा हरियो घाँस उपलब्ध होस् भन्ने उद्देश्यले युवाहरुले घाँस रोप्ने कार्यक्रम सञ्चालन गरेका हुन् ।
उक्त अभियानमा जोडिन स्थानीय कुटो, कोदालो, हँसिया, गैची, बेल्चा, घाँसका विउ बेर्ना र साधन भएकाले मल बोक्ने ट्याक्टर लिएर कार्यक्रम स्थलमा सहभागि भएका थिए । युवा एकताको सन्देश प्रवाह र नमुना कार्यका लागि यो अभियान सफल हुने युवाहरुले विश्वास व्यक्त गरेका छन् ।
तस्विर सौजन्य : कार्यक्रम संयोजक विज्ञान भण्डारी
