गर्मी अत्याधिक बढेपछि तनहुँ र गोरखामा विद्यालयको पठनपाठन बन्द
भञ्ज्याङ न्यूज
पछिल्ला केही दिन यता अत्यधिक गर्मी बढेपछि तनहुँ र गोरखाका केही पालिकाका विद्यालयहरुले पठनपाठन बन्द गरेका छन् ।
गर्मी बढेपछि तनहुँका शुक्लागण्डकी र आँबुखैरेनी गाउँपालिकाका सबै विद्यालय बन्द गरिएका छन् ।
विद्यार्थीको स्वास्थ्यमा असर पर्ने अवस्था देखिएपछि पालिकाले सामुदायिक तथा संस्थागत विद्यालय बन्द गर्ने निर्णय गरेको हो ।
आँबुखैरेनीले यही जेठ २८ गतेदेखि असार १ गतेसम्म सबै विद्यालय बन्द गर्ने निर्णय गरिएको गाउँपालिकाका प्रशासकीय अधिकृत विष्णुप्रसाद शर्माले बताए ।
यस्तै देवघाट गाउँपालिकाले यसअघि नै विद्यालयको पठनपाठन बन्द गरेको छ । व्यास नगरपालिका भित्रका केही विद्यालयले पठनपाठन बन्द गरेका छन् ।
व्यास-१२ कमलबारीस्थित सिद्धेश्वरी माध्यमिक विद्यालय, दमौलीको सत्यवती, निर्मल, जलदेवी, पराशर लगायत विद्यालयले पठनपाठन बन्द गरेको नगरपालिकाको शिक्षा शाखा प्रमुख नविन पराजुलीले बताए ।
उनले भने, ‘विद्यालय व्यवस्थापन समितिबाट निर्णय गराएर पठनपाठन बन्द गर्न पाउने सामुदायिक र संस्थागत सबै विद्यालयलाई पत्राचार गरेका छौ ।’
तनहुँको भिमाद, भानु नगरपालिका, ऋषिङ, घिरिङ र म्याग्दे गाउँपालिकाका विद्यालयमा भने पठनपाठन जारी छ । भानु नगरपालिकाको शिक्षा शाखाले पनि एक सूचना जारी गरी आवश्यक परेमा वर्खे विदामा कट्टा गर्ने गरी विद्यालयको पठनपाठन बन्द गर्न र सो को जानकारी गराउन भनेको छ ।
यस्तै, गोरखाको पालुङटार नगरपालिकाले नगरक्षेत्र भित्रका सबै विद्यालयमा पठनपाठन बन्द गरेको छ । गर्मीले विद्यालयमा पठनपाठन गर्न नसकिने भएपछि नगरपालिकाले नगरक्षेत्रका ५३ वटै विद्यालय बन्द गर्ने निर्णय गरेको हो । ती सबै विद्यालय तीन दिन बन्द रहने पालुङटार नगरपालिकाका नगरप्रमुख विवस चिन्तनले जानकारी गराए ।
‘गर्मी हृवात्तै बढेपछि बालबालिकाको स्वास्थ्यमा समेत असर पर्न थालेपछि विद्यालय बन्द गरिएको हो’, उनले भने, ‘मंगलबारसम्म सम्पूर्ण विद्यालय बन्द रहने छन् । गर्मी बढ्दै गए थप समयका लागि पठनपाठन बन्द गरिने छ ।’
‘कक्षा कोठाभित्र बस्न सकिने अवस्था छैन’, उनले भने, ‘यस्तो अवस्थामा विद्यालय बन्द गर्नु उचित ठान्यौँ ।’
पालुङटार क्षेत्रमा शनिबार अधिकतम तापक्रम ४३ डिग्री भन्दा बढी पुगेको छ । पालुङटार नगरपालिका भित्र आठ हजारभन्दा बढी विद्यार्थी अध्ययनरत रहेको नगरपालिकाका शिक्षा, युवा तथा खेलकुद शाखाका अधिकृत माधव पोखरेलले बताए ।
