देवघाटमा ट्राफिकले उठायो सात लाख बढि राजश्व

तनहुँको देवघाटमा रहेको अस्थायी ट्राफिक प्रहरी पोष्टले गत आर्थिक वर्षमा सबैभन्दा बढी राजस्व संकलन गरेको छ । आर्थिक वर्ष २०७९/०८० मा भएको कामकारवाहीको विवरण सार्वजनिक गर्दै ट्राफिक प्रहरीले एक वर्षमै सात लाख रूपैयाँभन्दा बढी राजश्व संकलन गरेको जनाएको छ ।

पोष्टका प्रहरी सहायक हवल्दार बुद्धिराज महतोका अनुसार एक वर्षमै सात लाख चार हजार पाँच सय रूपैयाँ राजश्व संकलन गर्न सफल भएको हो । ‘देवघाटबाट एकैवर्षमा यति धेरै राजश्व संकलन भएको थिएन’, उनले भने, ‘ट्राफिक प्रहरीको सक्रियता बढेसँगै राजश्व संकलनमा पनि वृद्धि भएको छ ।’

पछिल्लो समय ट्राफिक नियम उल्लंघन गर्नेको संख्या बढेकाले पनि राजश्व संकलन बढेको उनको भनाइ छ । उनका अनुसार सबैभन्दा धेरै मोटरसाइकल र स्कुटर नै कारवाहीमा परेका छन् । वर्षभरिको तथ्याङ्क हेर्दा मोटरसाइकल र स्कुटर गरी ७६३ वटा दुइ पांग्रे सवारी ट्राफिक प्रहरीको कारवाहीमा परेका छन्, जसबाट पाँच लाख ४३ हजार रूपैयाँ राजस्व संकलन भएको छ ।

कार तथा जीपको कारवाहीबाट पनि ६८ हजार रूपैयाँ राजस्व संकलन भएको उनले बताए । वर्षभरिमा ११० वटा जीप तथा कार कारवाहीमा परेका थिए । सोही अवधिमा ६२ वटा ट्रक कारवाहीमा परेको र त्यसबाट मात्रै ४५ हजार रूपैयाँ राजस्व संकलन भएको छ ।

३८ वटा ट्याक्टरबाट पनि ३१ हजार पाँच सय रूपैयाँ राजस्व संकलन भएको उनले बताए । देवघाट क्षेत्रमा चल्ने २६ वटा अटोबाट १६ हजार पाँच सय रूपैयाँ राजश्व संकलन भएको ट्राफिक प्रहरीले जनाएको छ ।

देवघाटमा सुरक्षा सतर्कताको आवश्यकता बढ्नुका साथै ट्राफिक नियम उल्लंघन पनि बढेको हुँदा कारवाहीस्वरूप संकलित रकमबाट राजस्व बढेको उनको भनाइ छ । ‘यति सानो क्षेत्रमा वर्षमै यति धेरै राजस्व संकलन हुनु भनेको सामान्य कुरा होइन’, प्रहरी सहायक हवल्दार महतोले भने, ‘हामीले राजस्व संकलनको लक्ष्य लिएर चेकजाँचमा कडाइ गरेका होइनौँ । सुरक्षा सतर्कतालाई ध्यान दिएका हौँ ।’

सेयर गर्नुहोस्

प्रतिक्रिया दिनुहोस्

सम्बन्धित खवर