मर्स्याङदी करिडोरका स्थानीय तहहरु बीच समन्वय बैठक, के-के भए निर्णय ?

मर्स्याङदी नदी करिडोरका स्थानीय तहहरुको अन्तरपालिका समन्वय बैठक आइतबार तनहुँको बन्दिपुरमा सम्पन्न गरिएको छ । मर्स्याङदी नदी करिडोर समन्वय समितिमा तनहुँ, लमजुङ र गोरखाका ८ वटा स्थानीय पालिकाहरु आवद्ध भएका छन् ।

भानु नगरपालिका, वेशिसहर नगरपालिका, सुन्दरबजार नगरपालिका, राइनास नगरपालिका, पालुङटार नगरपालिका, बन्दिपुर गाउँपालिका, आँबुखैरेनी गाउँपालिका र दोर्दी गाउँपालिका मर्स्याङदी नदी करिडोर समन्वय समितिमा आवद्ध भएका छन् ।

मर्स्याङदी नदी करिडोर समन्वय समितिका संयोजक एवं भानु नगरपालिकाका नगर प्रमुख आनन्दराज त्रिपाठीको अध्यक्षतामा आयोजित बैठकमा करिडोर अन्तर्गतका स्थानीय तहको प्रमुख, उपप्रमुख, प्रमुख प्रशासकीय अधिकृत वडाध्यक्ष लगायतको उपस्थिति रहेको थियो ।

मर्स्याङदी कोरिडोर अन्तर्गतका पालिकामा पर्यटनको प्रबर्द्धन र सम्भाब्यता अध्ययनको लागि तपसिल अनुसार मर्स्याङदी कोरिडोर पर्यटन उपसमिति गठन गर्ने निर्णय गरिएको छ । दोर्दी गाउँपालिका अध्यक्ष युवराज अधिकारीको संयोजकत्वमा र्राईनास नगरपालिका नगर प्रमुख खड्क बहादुर गुरुङ्ग र बन्दीपुर गाउँपालिका अध्यक्ष सुरेन्द्र बहादुर थापा सदस्य रहने गरी उपसमिति गठन गरिएको छ ।

यस्तै बैठकले मर्स्याङदी कोरिडोरका स्थानीय तहहरु भित्र सिसाजन्य फोहोरमैलालाई दुइ वा दुइभन्दा बढी पालिकाहरुलाई पायक पर्ने उपयुक्त स्थान छनोट गरी लगानी साझेदारीको माध्यमबाट ब्यबस्थापन गर्ने निर्णय गरिएको छ ।

मर्स्याङदी कोरिडोर अन्तर्गत लमजुङको मर्स्याङदी गाउँपालिका, लमजुङलाई पनि समावेस गर्ने र अन्य पालिकासंग आगामी दिनमा समन्वय गरी सहकार्य गर्ने बैठकले निर्णय गरेको बन्दीपुर गाउँपालिकाका अध्यक्ष सुरेन्द्र बहादुर थापाले बताए । कोरिडोर अर्न्तर्गतका स्थानीय तहहरु बिच ३/३ महिनामा संयुक्त बैठक र आगामी बैठक फागुन १२ गते बेशिशहर नगरपालिकामा बस्ने निर्णय गरिएको अध्यक्ष थापाले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर