व्यास नगरपालिकाले १५ स्वर्ण सहित राष्ट्रपति रनिङ शिल्ड जित्यो

तनहुँको दमौलीमा सम्पन्न १५औं जिल्ला स्तरीय राष्ट्रपति रनिङ शिल्ड प्रतियोगिताको उपाधी व्यास नगरपालिकाले जितेको छ । व्यास नगरपालिकाले १५ स्वर्ण, १ जत र ९ कास्य पदक सहित राष्ट्रपति रनिङ शिल्ड प्रतियोगिताको विजेता बन्न सफल भएको हो ।

दमौली स्थित निर्मल माध्यमिक विद्यालयको प्राङ्गणमा सम्पन्न प्रतियोगितामा ५ स्वर्ण, ३ रजत र ३ कास्य पदक जितेर शुक्लागण्डकी नगरपालिका उपविजेता बन्न सफल भएको छ ।

तनहुँका १० वटै पालिकामा सञ्चालन गरिएको प्रतियोगिताबाट छनौट भइ आएका विद्यार्थी खेलाडीहरु बीच विभिन्न खेलकुदमा गरिएको प्रतिस्पर्धामा ३ स्वर्ण, १ कास्य सहित बन्दीपुर गाउँपालिकाले तृतीय स्थान प्राप्त गर्न सफल भएको छ ।

विजेता व्यास नगरपालिकालाई ट्रफी र रनिङशिल्ड प्रदान गरिएको खेलकुद विकास समितिका अध्यक्ष अनिल पाण्डेले जानकारी दिए ।

छात्रछात्रा भलिबलतर्फ दुवैको उपाधि शुक्लागण्डकी नगरपालिकाले जितेको छ । त्यस्तै छात्रछात्रा दुवैमा भिमाद नगरपालिका द्वितीय भएको छ । छात्रतर्फ तृतीय देवघाट गाउँपालिका र छात्रातर्फ आँबुखैरेनी गाउँपालिका तृतीय भएको छ ।

कबड्डी छात्रमा प्रथम बन्दीपुर गाउँपालिका, द्वितीय म्याग्दे गाउँपालिका र तृतीय व्यास नगरपालिका भएको छ । छात्रातर्फ व्यास नगरपालिका प्रथम, म्याग्दे गाउँपालिका द्वितीय र भानु नगरपालिका तृतीय भएको छ ।

एथलेटिक्समा व्यास नगरपालिका प्रथम, शुक्लागण्डकी नगरपालिका द्वितीय र म्याग्दे गाउँपालिका तृतीय भएको छ ।

प्रतियोगितामा भलिबल, एथलेटिक्स, कबड्डी, कँराते, तेक्वान्दो र उस्सु लगायतका खेल सञ्चालन गरिएको थियो ।

प्रतियोगितामा जिल्लाका १० वटै स्थानीय तहका सात सय भन्दा बढि विद्यार्थीहरुको सहभागिता रहेको थियो । पालिका स्तरमा आयोजित राष्ट्रपती रनिङसिल्ड प्रतियोगितामा उत्कृष्ट भएका विद्यार्थी नै जिल्ला स्तरको प्रतियोगितामा सहभागी भएका थिए ।

जिल्ला स्तरमा भएको प्रतियोगितामा उत्कृष्ट प्रतिभा देखाएका एक सय ५० जना खेलाडीहरु प्रदेश स्तरीय प्रतियोगितामा सहभागी हुने पाण्डेले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर