भानु नगरपालिकामा “विपन्न नागरिक” सहयोग कार्यक्रम

तनहुँको भानु नगरपालिका कार्यालयले ‘विपन्न नागरिक’ सहयोग कार्यक्रमलाई निरन्तरता दिएको छ । मिर्गौला डायलाइसिस, मिर्गौला प्रत्यारोपण, क्यान्सर, मेरुदण्ड र पक्षघात भएकाको उपचारका लागि सहयोग गर्ने कार्यक्रमलाई प्राथमिकता दिएको हो ।

हाल विभिन्न वडाबाट नगरपालिकामा ती रोगको उपचारका लागि ५५ जनाको नाम सिफारिस भएको छ । उक्त प्रकृतिका बिरामीका लागि मासिक रु पाँच हजार उपचार खर्च उपलव्ध गराउदै आएको नगरपालिकाले जनाएको छ ।

नगरपालिकाको १३औं नगर सभाबाट विपन्न नागरिक सहयोग कार्यक्रमका लागि रु ४० लाख बजेट विनियोजन गरिएको नगरप्रमुख आनन्दराज त्रिपाठीले बताए । स्वास्थ्य केन्द्रहरूमा पाठेघरको मुखको क्यान्सरसम्बन्धी जाँच गर्ने अभियान सुरु गरेको उनले बताए ।

कोभिड-१९ नियन्त्रण तथा व्यवस्थापनका लागि लक्षित जनसंख्याले कोभिडविरुद्धको खोप प्राप्त गरिसकेका छन् । किशोरीहरूको प्रजनन् स्वास्थ्य सम्बन्धी चेतनामूलक कार्यक्रम, पोषण स्थिति सुधार कार्यक्रम सञ्चालन गरिएको उनले बताए ।

यस्तै, स्वास्थ्य क्षेत्रको पूर्वाधारतर्फ पुरानडिही नगर अस्पतालको अत्याधुनिक भवन निर्माण कार्य अन्तिम चरणमा अगाडि बढेको छ । नागरिकलाई स्वास्थ्य सेवामा पहुँच पुर्‍याउन सुविधासम्पन्न अस्पताल निर्माण कार्यलाई प्राथामिकता दिइएको छ ।

कालीमाटी अस्पतालको निर्माणका लागि ठेक्का सम्झौता भएतापनि अस्पताल भवनको डिपीआर अनुसार यकिन गरिएको स्थानमा ‘लेआउट’ गर्दा जग्गा विवाद भएपछि अन्यत्र व्यवस्था गरी निर्माण प्रक्रिया अघि बढाइएको छ ।