शुक्लागण्डकीका ४० युवालाई प्राविधिक तालिम
तनहुँको शुक्लागण्डकी नगरपालिकाको युवासंग नगर उपप्रमुख कार्यक्रम अन्तर्गत ४० जना युवाहरुलाई प्राविधिक तालिम दिइएको छ । नगरपालिकाले १२ वटै वडाका युवाहरुलाई एक महिने घरायासी विद्युतीय उपकरणको मर्मत सम्बन्धी तालिम प्रदान गरी दक्ष बनाएको हो ।
शुक्लागण्डकी नगरपालिकाका उपप्रमुख खुमबहादुर विक राजुले युवा विदेश पलायनलाई कम गर्ने उद्देश्यले यसबर्ष तीन वटा कार्यक्रम सुरु गरिएको बताए । उच्च शिक्षा हाँसिल गरेका युवाको रुचि पहिचान गर्ने र परामर्श दिने, प्राविधिक सीप प्रदान गर्ने र युवालाई माटो र उत्पादनसंग जोड्दै उत्पादित वस्तुको बजारीकरणसम्मको व्यवस्था मिलाउने गरी युवासंग नगर उपप्रमुख कार्यक्रम सुरुवात गरिएको उनले बताए ।
‘हामीले आर्थिक विकाससंग जोडिएर धेरै कार्यक्रम गर्नुपर्ने छ । संघीय मामिला मन्त्रालयले शुक्लागण्डकीलाई पनि छनौट गरेर १ करोडको कार्यक्रम स्वीकृत भएको छ’, उपप्रमुख विकले भने, ‘संघको ७५ लाख र नगरको २५ लाख गरी यो कार्यक्रम पनि छिट्टै सुरु गर्नेछौँ । तालिम पश्चात युवाहरुले स्वदेशमै लगानी गरेर आम्दानी गरेको वा विदेश नै गएको भएपनि राम्रो आम्दानी गरेको सुन्न पाउनेमा विश्वस्त छौ ।’
तालिम समापन कार्यक्रममा वडा नं. ५ का अध्यक्ष दीर्घबहादुर थापाले तालिम सकिएपछि सिकाई निरन्तर चलिरहने बताए । सहभागिकोतर्फबाट एक नारायण गौतमले अब बिग्रिएका घरायासी सामान मर्मतका लागि अन्यत्र धाउन नपर्ने र कवाडीको रुपमा बच्न नपर्ने बताउँदै तालिम निकै उपयोगी रहेको बताए । उनले थप यस्ता तालिमहरु ल्याउनुपर्नेमा जोड दिए । तालिममा ८६ जनाको आवेदन परेकोमा ८० जनाको अन्तरवार्ता लिइ ४० जना छनौट गरिएको थियो । सहभागीहरुले राइस कुकर, मिक्सर, इन्डक्सन चुलो, फ्रिज, वासिङ मेसिन, पानी तताउने जग, पङ्खा लगायतका घरायसी सामानको मर्मतबारे सीप सिकाइएको थियो ।
