ढोरबाराही मन्दिरको भेटीघाटी पारदर्शी बनाइदै
भञ्ज्याङन्यूज
तनहुँको शुक्लागण्डकी नगरपालिका-९ स्थित प्रसिद्ध धार्मिकस्थल ढोरबाराही मन्दिरको भेटीघाटी तथा दान सार्वजनिक गर्न थालिएको छ । मन्दिरमा चढाइएको भेटी तथा दानको हिसाब सार्वजनिक गर्नुपर्ने भन्दै नागरिकस्तरबाट आवाज उठ्न थालेपछि मन्दिर व्यवस्थापन समितिको सक्रियतामा भेटी तथा दानको हिसाब सार्वजनिक गर्न सुरू गरिएको नगरप्रमुख कृष्णराज पण्डितले बताए ।
‘अहिले भक्तजनबाट प्राप्त भेटी तथा दानको रसिद जारी गर्ने र नियमितरूपमा सार्वजनिक गर्ने काम भइरहेको छ’, उनले भने, ‘दानको रसिद दिने र आम्दानी सार्वजनिक गर्ने कार्यले पारदर्शिता बढ्ने आशा गरेका छौँ । यस कार्यले भेटी र दान प्राप्त हुने दरसमेत बढेको छ । गत चैतमा मात्रै रु तीन लाख भेटी संकलन भएको छ ।’
ढोरबाराही मन्दिर जङ्गलको बीच भागमा अवस्थित छ । मन्दिरसँगै रहेको पोखरी र पोखरीमा रहेका माछाले यहाँ पुग्ने भक्तजनलाई लोभ्याउने गरेका छन् । सो पोखरीमा बेलाबेला लहरी छुट्ने गरेकामा यसलाई धार्मिक शक्तिसँग जोड्ने गरिएको छ ।
हिमवत्खण्ड पुराणमा समेत चर्चा गरिएको यस मन्दिरमा विसं १९०४ देखि चढाइएका घण्टहरू समेत रहेका छन् । यहाँ नयाँ वर्षको दिन र वैशाख महिनाभर, बडादसैं, चैतेदसैंको नवदुर्गा अवधिभर, श्रीपञ्चमी र हिउँदयाममा विशेष पूजाअर्चना हुने गरेको छ ।
मनोकाङ्क्षा पूरा हुने जनविश्वासकासाथ यस मन्दिरमा तनहुँसँगै छिमेकी जिल्ला कास्की, स्याङ्जा, लमजुङ, पाल्पा, गोरखा, चितवन, नवलपरासीलगायत विभिन्न जिल्लाबाट भक्तजन आउने गरेका छन् । नगरपालिकाले रु ३१ लाख चार हजार नौ सय ४० को लागतमा ढोरबाराही मन्दिरसम्म पुग्ने बाटो स्तरोन्नति गरेपछि भक्तजनहरूलाई यहाँ आउन सहज भएको छ ।
