तनहुँ प्रहरीले एकै दिन २४ जना फरार प्रतिवादीहरुलाई पक्राउ गर्यो
- भञ्ज्याङ समाचारदाता (दमौली)
तनहुँ प्रहरीले आइतबार विभिन्न अपराध एवं मुद्दाहरुमा संलग्न रही फरार रहेका तथा अदालतबाट फैसला भई दण्ड, जरिवाना, दसौदी, कोर्ट फि र सरकारी बिगो समेत तिर्न बाँकी भएका २४ जनालाई पक्राउ गरेको छ । प्रहरीले जिउ मास्ने बेच्ने मुद्दामा तनहुँ जिल्ला अदालतको मिति २०४९ मंसिर ८ गतेको फैसलाले २ बर्ष८ महिना २२ दिन कैद हुने गरी सजाय सुनाएकोमा तोकिएको कैद भुक्तान गर्न बाँकी रही हालसम्म फरार रहेका देवघाट गाउँपालिका-३ स्थायी घर भई हाल बन्दिपुर गाउँपालिका-२ बस्ने बर्ष६१ को खड्क बहादुर दमैलाई २८ बर्षछि पक्राउ गरेको छ ।
यस्तै, लागु औषध मुद्दामा मोरङ जिल्ला अदालतको मिति २०६८ पुस २५ गतेको फैसलाले २ महिना कैद र रु. २ हजार जरिवाना हुने गरी सजाय सुनाएकोमा तोकिएको कैद तथा जरिवाना भुक्तान गर्न बाँकी रही हालसम्म फरार रहेका तनहुँ भानु-६ बस्ने प्रभात भन्ने प्रभु ढकाललाई ९ बर्षछी पक्राउ गरेको छ ।
सवारी ज्यान मुद्दामा तनहुँ जिल्ला अदालतको मिति २०६३ कात्तिक १२ गतेको फैसलाले १ महिना कैद सजाय सुनाएकोमा तोकिएको कैद मध्ये ७ दिन कैद भुक्तान गर्न बाँकी रही बिगत १४ बर्षदेखि फरार रहेका साबिक देवघाट गाविस-४ बस्ने सन बहादुर थापा मगर लगायत अन्य कर्तव्य ज्यान मुद्दामा फरार १ जना, मानव बेचबिखन तथा ओसारपसार मुद्दामा फरार ७ जना सम्बन्ध बिच्छेद मुद्दामा फरार २ जना, केही सार्वजनिक अपराध मुद्दामा फरार ५ जना, दर्ता बदर सार्बजनिक गरीपाउ मुद्दामा फरार २ जना, जालसाजी मुद्दामा फरार २ जना जारी मुद्दामा फरार १ जना र सवारी ज्यान मुद्दामा फरार १ जनालाई आइतबार पक्राउ गरिएको प्रहरी नायब उपरीक्षक युवराज तिमिल्सिनाले जानकारी गराएका छन् ।
२४ जना प्रतिबादीहरुबाट २५ देखी २२ हजार रुपैयाँसम्म जरिवाना तथा ७ दिनदेखि २ बर्ष ९ महिनासम्म कैद सजाय भुक्तान नगरी हालसम्म फरार रहेकाहरुलाई जिल्ला प्रहरी कार्यालय तनहुँ तथा मातहत प्रहरी इकाइ कार्यालयहरुबाट पक्राउ गरी तोकिएको जरिवाना ५६ हजार ९८५ रुपैयाँ र २ बर्ष१० महिना २९ दिन कैद भुक्तानको लागि तनहुँ जिल्ला अदालतमा उपस्थित गराइएको प्रहरी नायव उपरीक्षक तिमिल्सिनाले बताएका छन् ।
