व्यास र भानु जोड्ने बागेश्वरी मार्गको स्तरोन्नति गरिदै
दमौली : तनहुँको व्यास नगरपालिका–११ स्थित बागेश्वरी सडक स्तरोन्नति गरिने भएको छ । यस सडकलाई दश दिनसम्म यातायात आवगमन बन्द गरी बरभञ्ज्याङदेखि पड्केपसल खण्डमा बक्स कल्भर्ट निर्माण गरिने भएको छ ।
बागेश्वरी मोटरमार्ग उपभोक्ता समितिले बुधबारदेखि दश दिनका लागि उक्त खण्डमा सवारीसाधन आवगमनमा रोक लगाइएको उपभोक्ता समितिका अध्यक्ष विवेक भट्टराईले जानकारी गराए ।
उक्त मोटरमार्गको घाँसीकुवादेखि बरभञ्ज्याङसम्म भने सवारीसाधन सञ्चालन गर्न सकिनेछ । सो खण्डमा कालोपत्र समेत गर्न लागिएको छ । बाटो खुलेको ३१ वर्षपछि सडक कालोपत्र सुरु गरिएको हो ।
संघीय सरकारबाट रु चार करोड बजेट विनियोजन भएपछि सडकको कालोपत्रलगायत स्तरोन्नतिको काम सुरु गरिएको भट्टराईले बताए । व्यास नगरपालिका–११ देखि भानु नगरपालिका–६ जोड्ने खण्डमा सडक स्तरोन्नतिको काम भइरहेको उनले बताए ।
पहिलो चरणमा व्यास नगरपालिका–११ शेरादेखि ढुङ्गाखानीसम्म करिब एक किलोमिटर खण्ड कालोपत्र हुनेछ । जसअनुसार पाँच दशमलव पाँचदेखि सात दशमलव पाँच मिटरसम्म चौडाइ र नाला निर्माण गरिने जनाइएको छ । हालसम्म ८५० मिटर सडक कालोपत्र भइसकेको छ ।
अध्यक्ष भट्टराईले भने, “सडक खुलेको ३१ वर्षपछि यसको स्तरोन्नतिको काम भइरहेको छ । सडक कालोपत्रसँगै यस भेगका जनतालाई आवतजावतमा सहज हुनेछ ।”
