घिरिङमा आयोजित छैठौं राष्ट्रपति रनिङ शिल्डको उपाधि चन्द्रज्योती माविले जित्यो
घिरिङ : तनहुँको घिरिङ गाउँपालिकामा आयोजित छैठौं राष्ट्रपति रनिङ शिल्ड प्रतियोगिता सम्पन्न भएको छ । ‘स्वास्थ्यका लागि खेलकुद राष्ट्रका लागि खेलकुद’ भन्ने मुल नारासाथ पुस २५ देखि २९ गतेसम्म विभिन्न खेलकुद प्रतिस्पर्धा आयोजना गरिएको थियो । उक्त प्रतियोगिता घिरिङ गाउँपालिकाको वडा नं ४ स्थित महेन्द्र माध्यमिक विद्यालयको प्राङ्गणमा एथलेटिक्स खेल र वडा नं. ३ स्थित पोखरिछापमा भलिबल खेलको आयोजना गरिएको थियो ।
प्रतियोगितामा सात वटा विद्यालयहरू सहभागी थिए। चन्द्रज्योती माध्यमिक विद्यालयले १७ स्वर्ण, ३ रजत र १ कास्य पदक सहित २१ पदक जितेर पहिलो स्थान हासिल ग¥यो । महेन्द्र ज्योती माबिले ४ स्वर्ण, ५ रजत र ९ कास्य पदक प्राप्त गर्दै दोस्रो स्थान प्राप्त गरेको छ भने दीपक माबिले ३ स्वर्ण, २ रजत र ५ कास्य पदक सहित तेस्रो स्थान प्राप्त गर्न सफल भएको छ ।
यस प्रतियोगितामा १४ विभिन्न प्रकारका खेलहरू सञ्चालन गरिएको थियो, जसमा छात्र र छात्रा मिलाएर २८ खेलहरू आयोजीत भएका थिए ।
विजेताहरुलाई नगद पुरस्कार सहित शिल्ड, ट्रफी, मेडल र प्रमाणपत्र दिइएको छ । चन्द्रज्योती माबिलाई ३० हजार, महेन्द्र ज्योती माबिलाई २० हजार र दीपक माबिलाई १० हजार नगद पुरस्कार प्रदान गरिएको छ ।
समापन कार्यक्रममा घिरिङ गाउँपालिका अध्यक्ष होम बहादुर थापाले पुरस्कार वितरण गरेका थिए । उनले खेलकुदको महत्वलाई जोड दिँदै गाउँपालिकामा खेलकुद मैदानको अभाव रहेको भन्दै बजेट बिनियोजन गरिएको जानकारी दिए। साथै, कृष्ण मोटरमार्ग निर्माणका लागि संघीय र प्रदेश सरकारको ध्यानाकर्षण गरिनुपर्ने कुरा पनि उठाए ।
कार्यक्रममा प्रमुख प्रशासकीय अधिकृत कृष्ण प्रसाद ढकाल, वडा २ का अध्यक्ष नर बहादुर थापा, र एमाले घिरिङका अध्यक्ष सुमन कुमार श्रेष्ठ लगायतले आ–आफ्ना विचार व्यक्त गरेको चन्द्रज्योती माबिका प्रधानाध्यापक प्रेम थापाले जानकारी गराए ।
