तनहुँको आँवुखैरेनी घलडाँडाका कृषकले १५ वर्षपछि पुनः सुरु गरे गहुँ खेती

आँवुखैरेनी : तनहुँको आँवुखैरेनी गाउँपालिका–६ घलडाँडामा रहेको ‘घलडाँडा कृषक समुह’का कृषकहरूले १५ वर्षको अन्तरालपछि गहुँ खेतीमा उत्साहका साथ फर्किएका छन् । गाउँपालिकाको कृषि शाखाको सहयोग र प्राविधिक मार्गदर्शन प्राप्त गरेपछि समुहका कृषकहरूले २० रोपनी क्षेत्रफलमा सामुहिक रूपमा गहुँ खेती गरेका हुन् ।

समुहले पछिल्लो समय गहुँ खेतीमा योग्य बीउ र आधुनिक कृषि प्रविधिको अभाव जस्ता समस्याले गहुँ खेती गर्न छाडेका थिए । गाउँपालिकाले कृषि शाखा मार्फत उन्नत जातको बीउ र प्रविधिको व्यवस्थापन गरेपछि कृषकहरूको मनोबल उच्च भएको कृषि शाखाका प्रमुख सन्तोष केसीले बताए ।

उनले भने, ‘गाउँपालिकाले आवश्यक साथ सहयोग उपलब्ध गराउन थालेपछि कृषकहरु गहुँ खेतीमा निरन्तरता दिने अठोट लिएका छन् । यहाँका कृषकहरु समुहमा आवद्ध भई १५ वर्षपछि पुनः गहुँ खेती गर्न थाल्नु भएको छ । खेती विस्तारलाई गाउँपालिकाले आवश्यक साथ सहयोग उपलब्ध गराउने छ ।’

कृषक समुहका सदस्यहरुले १५ वर्षपछि गहुँ खेतीमा फर्किएको र यसले हामी कृषकहरुको आत्मविश्वास बढाएको बताएका छन् । अझ साथ सहयोग पाएमा र उत्पादित उपजको बजारिकरणका लागि सहयोग प्राप्त भएमा आगामि दिनमा गहुँ खेती विस्तारमा थप सक्रिय हुने स्थानीय कृषकहरुले बताएका छन् ।

गाउँपालिकाले कृषि प्रविधि र उन्नत बीउको उपलब्धता सुनिश्चित गर्दै कृषकहरूको उत्पादन क्षमता सुधारमा महत्वपूर्ण योगदान गरेको छ । कृषकहरूको यस उत्साहजनक प्रयासले समग्र गाउँको कृषि विकासमा महत्वपूर्ण भूमिका खेल्ने अपेक्षा गरिएको कृषि शाखा प्रमुख केसीले बताए ।

गाउँपालिकाको यस प्रकारको सहयोगले ग्रामीण कृषि क्षेत्रलाई नयाँ जीवन दिने मात्र होइन, भविष्यमा समृद्धि र आत्मनिर्भरता हासिल गर्न पनि मद्दत पु¥याउने गाउँपालिकाले विश्वास लिएको छ ।