प्रजातन्त्र सेनानी श्रेष्ठको निधन, कांग्रेस तनहुँले तीन दिन पार्टीको झण्डा झुकाउने
दमौली : प्रजातन्त्र सेनानी मोतीकुमार श्रेष्ठको ९३ वर्षको उमेरमा उपचारका क्रममा काठमाडौंमा निधन भएको छ । तनहुँको व्यास नगरपालिका–२ दमौली निवासी नेपाली कांग्रेसका नेता श्रेष्ठको मंगलबार राति निधन भएको हो । विसं २००७ को जनक्रान्तिमा बन्दीपुरमा भएको संघर्षमा उनले अग्रपंक्तिमा रहेर काम गरेका थिए। उनका मंगलबारै पशुपति आर्यघाटमा दाहसंस्कार गरिएको छ ।
यसैबीच, नेपाली कांग्रेसका सभापति शेरबहादुर देउवाले प्रजातन्त्र सेनानी श्रेष्ठको निधनप्रति गहिरो दुःख व्यक्त गर्दै शोकाकूल परिवारजनमा हार्दिक समवेदना प्रकट गरेका छन् ।
नेपाली कांग्रेस तनहुँका पूर्व उपसभापति समेत रहेका श्रेष्ठको निधनमा पार्टीको झण्डा तीन दिन झुकाइने भएको छ । कांग्रेस तनहुँका सभापति जितप्रकाश आलेले बुधबार प्रेस विज्ञप्ती जारी बुधबार पार्टी कार्यालय बन्द गरी पार्टीको झण्डा तीन दिन झुकाउने र पार्टी एवं भातृसंस्था एवं शुभेच्छुक संस्थाका कार्यक्रम स्थगित गर्ने निर्णय भएको जनाएका छन् ।
स्व. श्रेष्ठले २००७ सालको बन्दीपुर लगायतका जनक्रान्ति, २०३६ सालको जनमत संग्रह, २०४२ सालको सत्याग्रह एवं २०४६ सालको जन आन्दोलन र २०६२/०६३ को संयुक्त जन–आन्दोलन लगायतका संघर्षहरुमा दिलोज्यानले समर्पित भएको व्यहोरा स्मरण गर्दै नेपाली काँग्रेस तनहुँले लोकतन्त्रका अथक योद्धा गुमाएको महशुस गरेको जनाइएको छ ।
