कोरोना संक्रमणबाट तनहुँका एक जनाको मृत्यु, ९ जना नयाँ संक्रमित थपिए
- भञ्ज्याङ समाचारदाता (दमौली)
कोरोना संक्रमणबाट तनहुँकी एक महिलाको पोखरामा मृत्यु भएको छ । व्यास नगरपालिका-१ की ६८ वर्षीया महिलाको उपचारका क्रममा गण्डकी मेडिकल कलेज, पोखरामा मृत्यु भएको स्वास्थ्य निर्देशनालय पोखराले जनाएको छ ।
तनहुँमा यो सहित कोरोना संक्रमणबाट मृत्यु हुनेको संख्या ११ पुगेको छ । यस अघि व्यास नगरपालिकामा ४ जना, भिमाद नगरपालिकामा ३ जना, आँवुखैरेनी गाउँपालिकामा २ जना, म्याग्दे गाउँपालिकामा १ जना र शुक्लागण्डकी नगरपालिकामा १ जनाको मृत्यु भएको जिल्ला स्वास्थ्य कार्यालय तनहुँले जनाएको छ ।
यस्तै, आजमात्रै तनहुँमा ९ जना नयाँ कोरोना संक्रमित थपिएका छन् । स्वास्थ्य निर्देशनालय पोखराले सार्वजनिक गरेको विवरणमा लाईफ केयर डाइग्नोस्टिक एण्ड रिसर्च सेन्टर प्रा.लि. पोखराको प्रयोगशालामा गरिएको परीक्षणमा तनहुँका ४ जनामा कोरोना संक्रमण पुष्टि भएको छ । जसमा भिमाद ६ का ३७ वर्षका पुरुष र भिमाद ८ का ६२ वर्षका पुरुष, व्यास ५ का ३६ वर्षीय पुरुष र शुक्लागण्डकी ४ का २७ वर्षका पुरुषमा संक्रमण पुष्टि भएको छ ।
यस्तै, क्षयरोग उपचार केन्द्र पोखरामा गरिएको परीक्षणमा म्याग्दे गाउँपालिकाका ३ का २६ वर्षीया महिला र म्याग्दे ६ का ४३ वर्षीय पुरुषमा संक्रमण पुष्टि भएको छ ।
निर्देशनालयका अनुसार भरतपुर अस्पतालमा गरिएको परीक्षणमा ऋषिङ गाउँपालिका १ का ३३ वर्षीय पुरुष, व्यास ८ का ४० वर्षीय पुरुष र शुक्लागण्डकीका २७ वर्षीय पुरुषमा पनि संक्रमण पुष्टि भएको छ ।
