बेंसीसहर कारागारका १०८ कैदी र थुनुवालाई दमौली र पोखरा सारियो
लमजुङ : लमजुङ सदरमुकाम बेंसीसहरस्थित कारागारको पर्खाल भत्किएपछि कारागारमा रहेका सबै कैदी र थुनुवालाई छिमेकी जिल्ला तनहुँको दमौली र कास्कीको पोखरास्थित कारागार सारिएको छ ।
कारागार कार्यालय बेंसीसहर, लमजुङमा ६ महिलासहित १०८ जना कैदी र थुनुवा थिए । एक जना थुनामा पठाउनुपर्ने पुरुष जिल्ला प्रहरी कार्यालयको थुनुवा कक्षमा रहेका छन् । उनीसहित १०९ जना कैदी र थुनुवालाई स्थानान्तरण गरिएको कारागार प्रशासनले जनाएको छ ।
कारागारको पश्चिमतिर रहेको कैदी र थुनुवा प्रवेश गर्ने एक मात्र ढोका (गेट) नजिकैको पर्खाल वर्षाका कारण बुधबार भत्किएको थियो । गेटसमेत भत्किने अवस्थामा पुगेपछि असुरक्षा महसुस गर्दै शनिबार कैदी र थुनुवालाई स्थानान्तरण गरिएको प्रमुख जिल्ला अधिकारी माधवप्रसाद पोखरेलले बताए ।
कारागार प्रशासक बेनीबहादुर मोक्तानका अनुसार कारागार कार्यालय तनहुँ, दमौलीमा ३१ जना र कारागार कार्यालय कास्की, पोखरामा ७८ जना कैदी र थुनुवा पठाइएको हो । तीमध्ये ६ जना महिला दमौली पठाइएको छ । दमौली र पोखरा पठाइएकामध्ये कैदी ५ जना महिला र ५२ जना पुरुष छन् भने थुनुवा १ जना महिला र ५१ जना पुरुष रहेका छन् ।
जिल्ला प्रहरी कार्यालय प्रमुख प्रहरी नायव उपरीक्षक रेशम बोहराले पुरुष कैदी र थुनुवालाई ४ वटा ठूला बस र महिला कैदी तथा थुनुवालाई एउटा माइक्रोबसमा राखेर दमौली र पोखरा पठाइएको जानकारी दिए । उनीहरूलाई सशस्त्र प्रहरी र नेपाल प्रहरीले स्कर्टिङ गरेर पठाइएको हो । प्रहरी निरीक्षकको कमान्डमा कैदी र थुनुवालाई कारागार प्रशासकसहित पठाइएको जनाइएको छ ।
पानी परिरहेको बेला बुधबार अपराह्न पौने ५ बजेतिर कारागारको पश्चिमपट्टि रहेको पर्खाल भत्किएपछि थप क्षति हुन सक्ने सम्भावना देखिएको र तत्काल मर्मत सम्भव नदेखिएकाले कैदी र थुनुवालाई स्थानान्तरण गर्नु परेको प्रमुख जिल्ला अधिकारी पोखरेलले बताए । उनका अनुसार कारागार मर्मत नभएसम्म उनीहरू पोखरा र दमौलीमै बस्नेछन् ।
वि.सं. २०२८ मा कुन्छाबाट सदरमुकाम बेंसीसहर सरेसँगै निर्माण गरिएको यो कारागार १० जना महिला र २५ जना पुरुष गरी ३५ जनाको क्षमताको हो। तर अहिले तेब्बर बढी कैदी र थुनुवा राखिँदै आएको थियो। कारागार जीर्ण हुँदा थप समस्या आइपरेको हो। यसअघि पनि कारागारको पर्खाल भत्किने गरेका थिए, तर यस पटक कैदी र थुनुवा स्थानान्तरण गर्नु परेको प्रशासनले जनाएको छ ।
