अलपत्र बन्यो दमौलीको नमुना पशुपन्छी अस्पताल भवन
दमौली : भेटेरिनरी अस्पताल तथा पशुसेवा विज्ञ केन्द्र तनहुँको हाताभित्र निर्माण गरिएको ‘नमुना पशुपन्छी अस्पताल’को भवन अलपत्र अवस्थामा पुगेको छ । निर्माण कम्पनीले समयमै काम नगरिदिदा अस्पताल भवन अलपत्र बन्न पुगेको हो ।
सम्झौता भएको मितिमा काम सम्पन्न नभएपछि कात्तिक मसान्तसम्मका लागि म्याद थप भएपनि ठेकदार गैरजिम्मेवार भएर काम अलपत्र छाडेको केन्द्रका प्रमुख रविनसन अधिकारीले बताए । अधिकारीले भने, ‘पटक पटक तोकेता गरेर फोन गरेका छौं, तर ठेकेदार सम्पर्कमा आएका छैनन् । काम अलपत्र परेको छ ।’
ठेकेदारले निर्माणको काम नगरेकाले थपिएको समयमा काम सम्पन्न हुने सम्भावना नदेखिएको प्रमुख अधिकारीले बताए । अधिकारीका अनुसार भवन निर्माणको जिम्मा चितवनस्थित इको विल्डर्सले पाएको छ । निर्माणाधिन भवनको ५५ प्रतिशत भुक्तानी र ७० प्रतिशत निर्माणको काम भएको बताइएको छ ।
केन्द्रका प्रमुख अधिकारीले भने, ‘जतिसक्दो चाँडो निर्माण सम्पन्न गर्न कम्पनीलाई दबाब दिँदै आएको भएपनि अटेर गरेकाले ठेक्का तोड्नु पर्ने अवस्था आउन लागेको छ ।’ पोखरामा र दमौलीमा सँगै काम सुरु भए पनि पोखरामा निर्माण सम्पन्न र सञ्चालनमा आइसकेको छ। दमौलीमा ठेकेदारको लापरबाहीले गर्दा सञ्चालन गर्न नसक्दा गुणस्तरीय सेवा प्रदान गर्न कठिन भएको उनले बताए ।
गण्डकी प्रदेश सरकारको मूल्य अभिवृद्धि कर (भ्याट) बाहेक चार करोड ९० लाखको लागतमा उक्त कम्पनीले ठेक्का सम्झौता गरेको थियो । बहुवर्षीय योजनाअन्तर्गत अस्पतालको भौतिक संरचना क्रमशः विस्तार गर्दै जाने योजनामा प्रदेश सरकारको छ। अस्पतालका आवश्यक भौतिक पूर्वाधार निर्माण गरी सञ्चालन गर्न १० करोड लाग्ने अनुमान छ ।
दमौलीमा पशु अस्पताल सञ्चालन भएपछि तनहुँका साथै छिमेकी जिल्ला गोरखा, लमजुङ र नवलपरासी आसपासका किसाना लाभान्वित हुने बताइएको छ । पशु धनलाई क्षति हुनबाट जोगाउन पशु स्वास्थ्य कार्यक्रम प्रभावकारी हुने भेटेरिनरी अस्पताल तथा पशुसेवा विज्ञ केन्द्रले जनाएको छ ।
केन्द्रका अनुसार गत पुसमा काम सम्पन्न हुनुपर्नेमा नभएपछि असार मसान्तसम्म थपिएपनि काम नभएपछि कात्तिक ३० गतेसम्मका लागि म्याद थप भएको हो । केन्द्रका प्रमुख अधिकारीले भने, ‘डेढ वर्ष अघि नै निर्माण पुरा हुनुपर्नेमा निर्माण कम्पनीको ढिलासुस्तीले तीन वर्षसम्म पनि अधुरै रहेको छ ।’
