बन्दीपुर अस्पताल : ग्रामीण तहमा ‘स्मार्ट स्वास्थ्य सेवा’को सफल उदाहरण बन्दै
तनहुँ : तनहुँको ऐतिहासिक पर्यटकीय गाउँ बन्दीपुर, जहाँ पछिल्ला वर्षहरूमा स्वास्थ्य सेवा पनि पर्यटक आकर्षणसरह विस्तार हुँदै गएको छ । अब बन्दीपुरवासीका लागि अस्पताल पुग्न समयको बाध्यता छैन । बिहानको चिया अघि वा बेलुकी घर फर्किएपछि पनि स्वास्थ्य सेवा लिन सकिने वातावरण बनेको छ ।
बन्दीपुर गाउँपालिका–४ स्थित बन्दीपुर अस्पतालले स्वास्थ्य सेवा प्रणालीलाई सहज र सर्वसुलभ बनाउने उद्देश्यले गत वैशाख १ गतेदेखि सञ्चालनमा ल्याएको “विस्तारित ओपीडी सेवा” अहिले स्थानीय बासिन्दाको दैनिकीमै मिसिएको छ । विद्यालय जाने विद्यार्थीदेखि बिहानै काममा निस्किने मजदुरसम्म, बेलुकी पसल बन्द गरेपछि अस्पताल धाउने व्यापारीदेखि बिहान घरधन्दा सकेर स्वास्थ्य परीक्षणमा आउने गृहिणीसम्म सबैले आफू अनुकूलको समयमा उपचार पाउने वातावरण पाएका छन् ।
असोजमा २ हजार बढि सेवाग्राही
अस्पतालको तथ्यांकअनुसार असोज महिनामा जम्मा २ हजार १८५ जना सेवाग्राहीले ओपीडी सेवा लिएका छन् । तीमध्ये ९३० जना (४२.५६%) ले नियमित कार्यालय समय (बिहान १० देखि दिउँसो २ बजेसम्म)मा सेवा लिएका हुन् भने १ हजार २५५ जना (५७.४४%) ले अतिरिक्त समयमा सेवा लिएका छन् । यो तथ्यांकले स्पष्ट देखाउँछm बन्दीपुरमा नियमितभन्दा अतिरिक्त समयमै बढी नागरिकले स्वास्थ्य सेवा लिने गरेका छन् । यसको अर्थ, स्वास्थ्य सेवा अब दैनिकी र पेशाको तालमेलमा ढालिएको छ ।
हरेक दिन बिहान ७ देखि बेलुकी ८ बजेसम्म सेवा
अस्पतालले सार्वजनिक बिदा र शनिबारसमेत हरेक दिन बिहान ७ बजेदेखि बेलुकी ८ बजेसम्म ओपीडी सेवा सञ्चालन गर्छ । यस अवधिमा नियमित टिकट लिएर कोही बिहानै उपचारका लागि आउँछन् भने कोही बेलुकी खेतबारीबाट फर्किएपछि अस्पताल धाउने गरेको अस्पतालका मेडिकल सुपरिटेन्डेन्ट डा. अनिल गिरीले बताए ।
डा. गिरी भन्छन्, “हामीले सेवा समय विस्तार गरेपछि गाउँकै बासिन्दाले बिहान–बेलुकी जस्तोसुकै समयमा सेवा पाउने वातावरण बनेको छ । असोजमा धेरै सार्वजनिक बिदा भएकाले नियमित समयभन्दा बढी सेवाग्राही अतिरिक्त समयमा आएका हुन् ।”
सेवाग्राहीको सहजतालाई प्राथमिकता
बन्दीपुर अस्पतालको विस्तारित सेवा ग्रामीण समुदायका लागि राहत सरह बनेको छ । बिहान ७ बजेदेखि नै ओपीडी खुल्दा काममा जाने मजदुर र विद्यार्थी वर्गका लागि सहजता भएको छ । त्यस्तै, बेलुकी ८ बजेसम्म सेवा निरन्तर रहेकाले दिनभर व्यापार गर्ने व्यवसायी र गृहिणी वर्गले पनि स्वास्थ्य परीक्षणका लागि समय निकाल्न सक्ने भएका छन् ।
स्वास्थ्य सेवाको नयाँ अभ्यास
पहिले कार्यालय समयमै पुग्न नसक्नेले उपचार ढिलो गर्नुपर्ने वा सानो समस्याले ठूलो रूप लिने स्थिति हुने गथ्र्यो । तर अहिले बन्दीपुरमा त्यो समस्या छैन । अस्तालका डा. गिरीले भने, “अस्पताल खुल्ने समय बढेसँगै सेवाग्राही सन्तुष्टि उल्लेखनीय रूपमा बढेको छ ।”
बन्दीपुर अस्पतालको यो अभ्यास ग्रामीण तहमा ‘स्मार्ट स्वास्थ्य सेवा’ को सफल उदाहरण बन्दै गएको छ । जनताको स्वास्थ्य पहुँच विस्तार गर्ने अभियानमा यो कदमले गाउँपालिकालाई नयाँ पहिचान दिलाएको गाउँपालिकाका अध्यक्ष सुरेन्द्र बहादुर थापा बताउँछन् ।
उनले भने, “गाउँपालिकाले सर्वसाधारणको आधारभूत आवश्यकतालाई पहिचान गरी सेवा प्रवाहलाई सहज बनाउँदै लगेको छ । यही अन्तर्गत अहिले बन्दीपुर अस्पतालले सेवालाई सहज बनाएको छ भने वडावडाका स्वास्थ्य संस्थाहरुमा पनि सेवा विस्तार गर्दै लगिएको छ ।”
