बन्दीपुरमा आयोजित राष्ट्रपति रनिङशिल्डको उपाधि पवित्रा माविले उचाल्यो
बन्दीपुर, २७ कार्तिक : तनहुँको बन्दीपुर गाउँपालिकाद्वारा आयोजित सातौँ राष्ट्रपति रनिङशिल्ड प्रतियोगिता–२०८२ मा पवित्रा माध्यमिक विद्यालय, पिप्लेले उत्कृष्ट प्रदर्शन गर्दै प्रथम स्थान हासिल गरेको छ ।
तीन दिनसम्म चलेको प्रतियोगितामा पवित्रा माविले १६ स्वर्ण, २ रजत र ५ कास्य पदकसहित समग्र विजेता बनेको हो । विद्यालयले यस वर्षको रनिङशिल्ड उपाधि पनि उचालेको छ ।
त्यस्तै, भानु माध्यमिक विद्यालयले ४ स्वर्ण, ५ रजत र ९ कास्य पदकसहित दोस्रो स्थान प्राप्त गरेको छ भने मनास्लु बोर्डिङ स्कुलले ४ स्वर्ण, ५ रजत र ५ कास्य पदकका साथ तेस्रो स्थान हासिल गरेको बन्दीपुर गाउँपालिकाले जनाएको छ।
प्रतियोगितामा भलिबल (छात्र–छात्रा), एथलेटिक्सका विभिन्न दौड प्रतियोगिता (१००, २००, ४००, ८००, १५०० र ३००० मिटर), रिले (४×१०० र ४×४०० मिटर), साथै फिल्ड इभेन्ट्स हाइजम्प, लङ जम्प, ट्रिपल जम्प, ज्याबलिन थ्रो र सटपुटमा विद्यार्थीहरूले प्रतिस्पर्धा गरेका थिए ।
विभिन्न विधामा प्रथम, द्वितीय र तृतीय हुने खेलाडीहरूलाई ट्रफी, मेडल र प्रमाणपत्रसहित सम्मान गरिएको गाउँपालिकाले जनाएको छ ।
विजेताहरुलाई गाउँपालिका अध्यक्ष सुरेन्द्र थापा, उपाध्यक्ष पञ्चमाया गुरुङ, प्रमुख प्रशासकीय अधिकृत कमलबहादुर केसी, वडा अध्यक्षहरु शिवकुमार श्रेष्ठ, परमेश्वर भट्टराई लगायतले पुरस्कार वितरण गर्नुका साथै शुभकामना व्यक्त गरेका थिए ।
