बन्दीपुरमा असोज ८ र ९ गते एचपीभी खोप लगाईदै
बन्दीपुर : तनहुँको बन्दीपुर गाउँपालिका स्वास्थ्य शाखाले पाठेघरको मुखको क्यान्सरविरुद्धको एचपीभी खोप कार्यक्रमसम्बन्धी अभिमुखीकरण तथा सञ्चार कार्यक्रम–२०८३ सम्पन्न गरेको छ । राष्ट्रिय खोप तालिकामा पाठेघरको मुखको क्यान्सरबाट बचाउने एचपीभी खोप थपिएसँगै आर्थिक वर्ष २०८३/८४ देखि नियमित खोप सेवाअन्तर्गत एचपीभी खोप सञ्चालन गरिने भएको हो ।
बन्दीपुर गाउँपालिकाका विद्यालयमा अध्ययनरत कक्षा ६ का छात्रा तथा विद्यालय नजाने १० वर्ष उमेरका किशोरीलाई एचपीभी खोप प्रदान गरिने स्वास्थ्य शाखाले जनाएको छ । खोप कार्यक्रम असोज ८ र ९ गते विद्यालय तथा तोकिएका खोप केन्द्रमार्फत सञ्चालन गरिने जनाइएको छ ।
स्वास्थ्य शाखाले पाठेघरको मुखको क्यान्सर रोकथाममा एचपीभी खोप प्रभावकारी हुने भएकाले लक्षित उमेर समूहका किशोरीलाई अनिवार्य रूपमा खोप कार्यक्रममा सहभागी गराउन अभिभावक, विद्यालय तथा सम्बन्धित सरोकारवालालाई आग्रह गरेको छ ।
