ल्होसार कपको उपाधी पल्टन एफसी चितवनले जित्यो
भञ्ज्याङ समाचारदाता/दुलेगौंडा
तनहुँको शुक्लागण्डकीमा आयोजित दोस्रो ल्होसार कप २०७८ सेभेन ए साइड फुटबल प्रतियोगिताको उपाधि पल्टन एफसी चितवनले जितेको छ । शनिबार भएको फाइनल खेलमा आयोजक भ्याली युथ क्बललाई पेनाल्टी सुटआउटमा ३-२ को गोल अन्तरले पराजित गरी पल्टनले उपाधि हात पारेको हो । निकै प्रतिष्पर्धात्मक भएको खेलको पहिलो हाफमा गोल गर्दै पल्टनले शुरुवाती अग्रता बनाएको थियो । तर, दोस्रो हाफको अन्तिम समयमा थप गरिएको इन्जुरी टाइममा पाएको फ्रि किकमा उत्कृष्ट गोल गर्दै भ्यालीले खेल बराबरीमा ल्याएको थियो ।
क्याप्टेन सुवास शाही ठकुरीले उपलब्ध गराएको पासलाई वान टच गर्दै श्यामकाजी परियारले गोल गरेका थिए । निर्धारित समयमा दुवैतर्फबाट १-१ गोलको बराबरी भएपछि खेल पेनाल्टी सुटआउटमा धकेलिएको थियो । जसमा पल्टनले बाजी मारेको हो । उपाधि विजेता पल्टनले नगद ५५ हजार ५५५ रुपैयाँसहित कप मेडल र प्रमाण पत्र पाएको छ ।
उपविजेतामा सिमित बनेको आयोजक भ्यालीले ३३ हजार ३३३ रुपैयाँमा चित्त बुझाएको छ । प्रतियोगितामा भ्यालीका श्यामकाजी परियार उत्कृष्ट खेलाडी घोषित भए । त्यस्तै भ्यालीकै अंकित थापा मगर सर्वाधिक गोलकर्ता बने । उनले प्रतियोगिता अवधिभर ४ गोल गरेका थिए। प्रतियोगितामा पल्टनका कृष्ण गुरुङ उत्कृष्ट गोलकिपर ठहरिए । उनीहरुले जनही १ हजार पाँच सय रुपैयाँसहित ट्रफि र प्रमाणपत्र हात पारे ।
विजेता समुह र उत्कृष्ट खेलाडीहरुलाई नेकपा एमालेका स्थायी कमिटी सदस्य तथा गण्डकी प्रदेशका पुर्व आर्थिक मामिला तथा योजनामन्त्री किरण गुरुङले पुरस्कार वितरण गरेका थिए । सो अवसरमा गुरुङले खेल र खेलाडी राष्ट्रको पहिचान र शान भएको बताउँदै आफना बच्चाहरुलाई पढ्न मात्र नभनेर खेलमा समेत सहभागी गराउनु पर्ने बताए । प्रतियोगितामा २९ समुहको सहभागीता रहेको थियो।
